Naýryz merekesin dáriptedi.
Naýryzbaı aýdany jastarynyń Komúnıtı ortalyǵy qolónershiler men shaǵyn qoldanbaly óner (hend-meıd stılinde) sheberleriniń «Gaýhartas» kórmesin uıymdastyrdy, dep habarlaıdy Almaty-akshamy.kz
Kórmege uıytqy bolǵan naýryzbaılyq qoldanbaly óner sheberlerimen birge, qalamyzdyń ózge aýdandarynan da kelgen sheber-jetekshiler jastardyń qolynan shyqqan qolóner týyndylaryn usyndy. Alań ıelerinen ózge, Túrksib, Almaly aýdanynan kelgen qolóner sheberleri ákelgen jastardyń qolynan shyqqan óner týyndylaryn tamashaladyq. Aýdanda ótken «Gaýhartas» atty shaǵyn qolóner buıymdarynyń kórmesine kelýshiler – negizinen, qalamyzdyń belsendi demalys ortalyqtarynyń jetekshileri, ókilderi.
«Sharanyń basty maqsaty – Memleket basshysy atap aıtqandaı, Naýryz merekesin, ıakı tatýlyq pen yntymaq meıramyn óz deńgeıinde ótkizý. Demek, onkúndik aıasynda «Naýryznama» dárejesinde maǵynaly dýmandatý. Biz de osy Ulystyń uly merekesin ár kúni áralýan etip toılatyp jatyrmyz. Búgin «Jańarý kúni» bolǵandyqtan, qazaqtyń baǵzydan beri bar dúnıe-múlkin jańǵyrtyp, olardyń shaǵyn kólemdegi túrlerin kórmege shyǵaryp otyrmyz. Almaty qalalyq Jastar saıasatyn qoldaý ortalyǵymen bastamasymen qurylǵan bizdiń ortalyq belsendi jastarǵa arnalǵan. Jastarymyz qazaqtyń ulttyq dástúrin dáriptep, otandastarymyzdyń salt-sanasyn jańǵyrtýǵa ózindik úlesin osylaı qosýda. Bizder jastarymyzdyń altyndaı ýaqytyn tıimdi ári paıdaly ótkizýine múddelimiz. Esigimiz árkez ashyq», deıdi Naýryzbaı aýdany jastarynyń Komúnıtı ortalyǵynyń jetekshisi Almas Baızaqov.
Kórmege kelgenderiń kóbiniń jas mólsheri 18 ben 35 jas aralyǵynda. Desek te, qyryqtyń qyrqasyna shyqqan sheberler de ádeıi kelip, jastardyń jasaǵan óner týyndylaryn kórsetip, onyń jasalý jolyn táptishtep túsindirip jatty. Solardyń ishinde, aıryqsha nazar aýdartqany «Ushqyndar» demalys ortalyǵy jetekshi-sheberi aldyndaǵy qolóner buıymdary boldy.
«Ótkensiz bolashaq joq» demekshi, keıingi urpaq ata dástúrge qanyq bolýy qajet. Myna sharanyń tanymdyq mánisi solaı. Neshe túrli qolóner buıymdary, kıizden jasalǵan ónimder asa uqyptylyq pen eptilikti kerek etedi. Eń bastysy, jas órendi, jastardy eńbekke baýlý, eńbekqorlyqqa tárbıeleý.
«Biz balalardy qolónerge baýlý arqyly adal eńbekke úıretemiz. Kishkentaı qyzdar sheshelerine túrli qolóner buıymdaryn jasap, syılyq ázirleıdi. Ári eńbek, ári kishigirim tabys kózi desek tolar. Óıtkeni, sol shaǵyn dúnıe, syılyqtyń ózi qundy. Balalarǵa qazaqtyń dombyrasyn úıretýdi qolǵa alýdamyz. Balalarmen birge olardyń ata-analary da qyzyǵa úırenýde. «Naǵyz qazaq – qazaq emes, Naǵyz qazaq – dombyra» demekshi, osy bir ulttyq mýzykalyq aspap ulttyq qundylyǵymyzdyń bastaýynda tur ǵoı. Demalys ortalyǵymyz Er Jánibek kóshesi, 3a-úıde ornalasqan», deıdi naýryzbaılyq sheber, «Báıterek» demalys ortalyǵynyń jetekshisi Meıirgúl Qazybaeva.
Myna shara -- shaǵyn kólemdegi qolóner buıymdarynyń kórmesi. Kórme bir jaǵynan, kánigi sheberler men jas sheberlerdiń tájirıbe almasýyna múmkindik beretin basqosý. Minekeı, Ulystyń ulyq merekesi – Naýryz merekesiniń bir kúnin naýryzbaılyqtar osylaı toılatty.