Jańǵyrtý jobasy Naýryzbaı aýdanynyń elektr jelileriniń tozýyn 30% tómendetýge múmkindik beredi. Elektr jelileri men transformatorlyq qosalqy stansıalardy jańǵyrtý – basty mindettiń biri
Almaty ákimi Erbolat Dosaev Naýryzbaı aýdanynyń turǵyndarymen kezdesýde elektr jelileri men transformatorlyq qosalqy stansıalardy jańǵyrtý aýdandaǵy ınjenerlik ınfraqurylymdy damytýdyń mańyzdy mindetiniń biri bolyp qala beretinin aıtty, dep habarlaıdy almaty-akshamy.kz
Qazirgi tańda aýdannyń elektr jelileriniń 85%-y tolyǵymen tozǵan, sondyqtan apattyq óshýler jıi bolyp turady. Aýdandy turaqty elektrmen qamtamasyz etý úshin 2021 jyldyń qyrkúıeginde merdiger uıym Aqjar, Qaraǵaıly, Quramys, Rahat, Taýsamaly jáne Shuǵyla shaǵyn aýdandarynda elektr jelilerin jańartý bastaldy. Alaıda sol jyldyń qarasha aıynda jobanyń qymbattaýyna baılanysty joba toqtatyldy. 2023 jyldyń maýsymynda túzetýlerden keıin jumys qaıta jandandy.
Joba aıasynda josparlanǵan 1231 tirektiń 854-i ornatylyp, 11,2 km elektr jelileri jańǵyrtyldy. Qosymsha 26 transformatorlyq qosalqy stansıa ornatylady. Jumysty bıyl qyrkúıek aıynyń sońyna deıin aıaqtaý josparlanǵan. Sonyń nátıjesinde jelilerdiń tozýy 30% azaıady.
«Alataý Jaryq kompanıasy» AQ jelisi boıynsha 17 transformatorlyq qosalqy stansıa men 98 km elektr jelisine kúrdeli jáne aǵymdaǵy jóndeý júrgizildi. Jyl sońyna deıin taǵy 54 transformatorlyq qosalqy stansıa men 150 km elektr jelileri jóndeledi.
Jyl basynan beri sapaly syrtqy jaryqtandyrýmen qamtamasyz etý úshin 20 km-den astam áýe jáne kabel jelileri men 2530 sham aýystyryldy. Jyl sońyna deıin taǵy 3 km áýe jáne kabel jelilerin jańǵyrtý, sondaı-aq 3 myń sham men 50 jaryqtandyrý tiregin aýystyrý kózdelgen. Sonymen qatar, jyl sońyna deıin «Halyq qatysatyn búdjet» baǵdarlamasy aıasynda aýdandaǵy jaryq ornatylmaǵan qalǵan 35 kóshe men tuıyq kóshelerge syrtqy jaryqtandyrý jelilerin júrgizý josparǵa engen.