Almatynyń Naýryzbaı aýdanynda aǵymdaǵy jyly 30 kóshe jóndeledi jáne 6 jańa kóshe salynady
Naýryzbaı aýdanynyń turǵyndarymen kezdesý barysynda Almaty ákimi Erbolat Dosaev aýdanda jol-kólik ınfraqurylymyn damytý jáne jolaýshylar tasymalynyń sapasyn arttyrý jónindegi jumystar týraly aıtyp berdi, dep habarlaıdy almaty-akshamy.kz
Qala ákimi bıyl aýdannyń 110 kóshesindegi 50 myń sharshy metr jol aǵymdaǵy jóndeýmen qamtylǵanyn habarlady. Qarasha aıynyń sońyna deıin 150 kóshede taǵy 20 myń sharshy metr joldy jóndeý josparlanýda.
«Búginde 8 kóshede 5 shaqyrym jolǵa ortasha jóndeý júrgizildi, qarasha aıynyń sońyna deıin uzyndyǵy 13 shaqyrym bolatyn taǵy 22 kóshe ortasha jóndeýmen qamtylady, qazan aıynyń sońynda Aqjar shaǵyn aýdanyndaǵy 6 kóshe boıynsha 2 shaqyrym jol qurylysyn aıaqtaý josparlanýda», - dedi Erbolat Dosaev.
Aýdanda magıstraldyq kóshelerdi uzartý jalǵasýda. Qarasha aıynyń sońyna deıin Abaı dańǵylyn Stroıtelnaıa kóshesinen qala shekarasyna deıin uzartýdy aıaqtaý josparlanýda. Tóle bı kóshesin uzartý úshin 270 jer ýchaskesi alynýy tıis, 170 jer ýchaskesi satyp alyndy, qalǵan ýchaskelerdi satyp alýdy jyl sońyna deıin aıaqtaý josparlanýda. Jubanov kóshesin uzartý úshin 346 jer ýchaskesi alynatyn bolady. 148 obekt boıynsha qaýlylar qabyldandy, ýchaskelerdi satyp alý 2025 jyldyń sońyna deıin josparlanǵan.
Qoǵamdyq kólikke qyzmet kórsetý sapasyn arttyrý týraly aıta kele, qala ákimi jyl basynan beri 10 baǵytta aralyqtardy qysqartý maqsatynda 150 avtobýs jańartylǵanyn aıtty. Turǵyndardyń jaılylyǵy úshin 12 jańa aıaldama pavılony ornatyldy, al jyl sońyna deıin buryn bolmaǵan taǵy 5 aıaldama ornatý josparlanýda.