Áz-Naýryz – jańarý men jańǵyrýdyń, bereke men birliktiń bastaýy.
Memleket basshysy Qasym-Jomart Toqaevtyń Naýryz meıramymen quttyqtaýy
Ardaqty aǵaıyn!
Barshańyzdy Ulystyń uly kúnimen shyn júrekten quttyqtaımyn!
Áz-Naýryz – jańarý men jańǵyrýdyń, bereke men birliktiń bastaýy. Jyldyń bul mezgili – kún men tún teńelip, jer júzi qaıta túleıtin shaq. Sondyqtan ata-babamyz ejelden shýaqty kóktem merekesine aıryqsha mán bergen, ony Ulystyń uly kúni dep ulyqtaǵan.
Qoǵamdaǵy tatýlyq pen kelisim dástúrleri ultymyzdyń salt-sanasy men ádet-ǵurpy túgel toǵysqan osy meıramnyń sıpatyna saı keledi. Naýryz búginde naǵyz halyqtyq merekege aınaldy.
Bul kúnderi meıirimdilik, janashyrlyq, jasampazdyq sıaqty qasıetter erekshe dáripteledi. Sonyń arqasynda elimiz birligin bekemdep, tatý-tátti ómir súrip jatyr.
Halqymyz árdaıym Naýryz meıramyn jaqsylyqtyń jarshysyna balaǵan. Qazaqstan damýdyń jańa dáýirine qadam basty. Túbegeıli ózgerister qasterli Otanymyzdy órkendetýge tyń serpin beredi dep senemin. Yntymaǵy jarasqan jurtymyzdyń yrysy artyp, qolǵa alǵan ıgi bastamalarymyz ońynan bolsyn, aǵaıyn!
Áz-Naýryz ár shańyraqqa shattyq pen qýanysh ákelsin!
Otbasylaryńyzǵa amandyq, qut-bereke tileımin!
Ulys oń bolsyn!
Aq mol bolsyn!