Bul joba qarttardy jumyspen qamtýǵa, olardyń damýyna jáne saýyǵýyna jańa múmkindikter ashýǵa baǵyttalǵan.
Naýryzbaı aýdanyndaǵy «Alma city» turǵyn úı kesheniniń aýmaǵynda qarttarǵa arnalǵan «Senim» demalys ortalyǵynyń saltanatty ashylýy ótti, dep habarlaıdy Almaty-akshamy.kz.
«Qazaq Stroy» qurylys kompanıasynyń erekshe jobasynyń tusaýkeserine jınalǵan qaýymnyń qarasy óte kóp boldy. Jınalǵan jurt «Senim» demalys ortalyǵynyń aýlasynda Ulystyń uly kúni Naýryz merekesin toılady. Turǵyndar qonaqtarǵa arnaıy jaıylǵan mol dastarhannan aýyz tıip, naýryz kójeden dám tatty. Sondaı-aq, saltanatty sharaǵa arnaıy shaqyrylǵan qonaqtardyń tálimdi áńgimelerin tyńdap, estrada juldyzdarynyń qatysýymen ótken merekelik konsertti tamashalady.
Qazaqstan Respýblıkasy resmı túrde qarty kóp elge jatady. Egde jastaǵy jandar halyqtyń 11% quraıdy. «Azamattarǵa arnalǵan Úkimet» korporasıasynyń deregine sáıkes Almaty zeınetkerler sany boıynsha Almaty oblysy men Shyǵys Qazaqstan oblystarynan keıingi úshinshi orynda eken.
Qarttardy jumyspen qamtý el azamattarynyń ómir súrý sapasyn arttyrýda asa mańyzdy is. Ádette úlken adamdar zeınetke shyqqanan keıin ózderin qoǵamǵa qajetsiz sanap, odan ári damýyn tejeıdi. Sondyqtan da ata-ájelerimizdiń densýlyǵy da syr berip, otbasynda bala-shaǵasymen arasynda kelispeshilikter týyndaıdy, bul qarttardyń ómir sapasynyń nasharlaýyna ákeledi. Bir otbasyda ár túrli býyn ókilderi ómir súrgendikten, túrli kózqarastardyń bolatyny zańdylyq. Keı jaǵdaıda jastar bólek shyǵyp, ata-analary ózderi qalady, mine osylaısha jalǵyzbasty qarttardyń sany artyp, qarym-qatynas tapshylyǵy men áleýmettený máseleleri bastalady.
Bul joba qarttardy jumyspen qamtýǵa, olardyń damýyna jáne saýyǵýyna jańa múmkindikter ashýǵa baǵyttalǵan. Sonymen qatar, zeınet jasynjaǵy adamdardyń ózderi qyzyǵatyn baǵyttaǵy salalardy tegin úırenýine múmkindik beredi. «Senim» demalys ortalyǵy turǵyn úı kesheniniń aýmaǵynda ornalasqandyqtan, osy keshende turatyn qarttarǵa úı aýmaǵynan shyqpaı-aq úıirmelerge barý yńǵaıly.
«Qazaq Stroy» kompanıasy egde jastaǵy adamdar úshin basqa da turǵyn úılerde osyndaı demalys ortalyqtaryn iske qosýdy josparlap otyr. Bul zeınetke shyqqannan keıingi ómirdiń jańa mádenıetin qalyptastyrýǵa, zeınetkerler úshin jańa múmkindikter ashýǵa, sol arqyly ómir sapasyn jaqsartýǵa jáne kúrdeli áleýmettik máselelerin azaıtýǵa jol ashady.
«Senim» demalys ortalyǵynyń ashylýyna, ziltemir kóterý jáne bitimge tartýdan Azıa men Qazaqstannyń qazirgi chempıony 76 jastaǵy Kazanseva Svetlana Ivanovna jáne ótken jyly áýesqoılar men ardagerler arasyndaǵy Qazaqstan chempıonatynda júzýden eki birdeı medal jeńip alyp, sensasıaǵa aınalǵan 61 jastaǵy múmkindigi shekteýli Chaker Smaǵulov qatysty. Sondaı-aq «Arýjanmen boı sergitý jattyǵýlary» sporttyq baǵdarlamasynyń turaqty júrgizýshisi jáne «Meıirimdilik» qaıyrymdylyq qorynyń negizin qalaýshy Arýjan Saın, bodıbıldıngten Eýropa, Azıa jáne Qazaqstan álem chempıony, belgili qoǵam qaıratkeri jáne iri sporttyq is-sharalardyń ıdeıalyq shabyttandyrýshysy Ýálıhan Ten qatysty.
Chaker Smaǵulov, 61 jastaǵy múmkindigi shekteýli sportshy:
Sporttyń arqasynda dertti jeńdim
- Men 2013 jyldan beri júzý sportymen aınalysyp kelemin. Jetken jetistikterim de az emes. Júzýden Qazaqstannyń bes dúrkin chempıony, Almaty oblysynyń on dúrkin chempıony boldym, júzýden sport sheberimin. Sport meniń densaýlyǵymnyń myqty bolýyna septigin tıgizdi. Osydan birneshe jyl buryn kovıdpen aýyrdym. Sol kezde sporttyq jattyǵýlar arqyly emdeldim, júregim syr bergen kezde de sporttyń arqasynda dertti jeńdim. Sondyqtan qansha jasqa kelse de adam sportpen aınalysýy kerek dep sanaımyn. Deni saý adamnyń jany da tynysh.
«Senim» demalys ortalyǵynda ıoga saýyqtyrý júıesi, bılárd, ústel tenısi, fıtnes baǵdarlama, shahmat, doıby, domıno, toǵyz qumalaq, vokal stýdıasy, karaoke, hor, mýzykalyq-teatr úıirmesi, akterlik sheberlikke úıretý, kompúterlik saýattylyq jáne áleýmettik jeli, otbasy psıhologıasy, mentaldy qabilettilik sekildi úıirmeler jumys isteıdi. Ortalyq basshysy Gúljan Nurtaevanyń aıtýynsha, bolashaqta bul baǵdarlama halyqtyń suranysy men usynysyna oraı keńeıetin bolady.