İshki ister mınıstrligi elden shyǵarylǵan reseılik dáriger jaıynda málimet taratty, dep habarlaıdy Almaty-akshamy.kz Inform.kz-ke silteme jasap.
Aıta keteıik, áleýmettik jelide reseılik dárigerdiń elden shyǵarylýy jóninde aqparat shyqty.
Almaty qalasy PD kóshi-qon qyzmeti basqarmasynyń málimetinshe, 23 qyrkúıek kúni RF azamaty Roman Alferov «Qordaı avto» baqylaý-ótkizý pýnktinde shekara qyzmetkerlerine tapsyrylǵan.
«Naýryzbaı aýdandyq sotynyń 2021 jylǵy 27 shildedegi sheshimimen Almaty qalasy PD Almaly aýdandyq PB aryzy boıynsha Qazaqstan zańnamasyn buzǵan Reseı azamaty Roman Alferov Qazaqstan shekarasynan shyǵaryldy. Sot sheshimin óz erkimen oryndaýǵa 10 kún merzim berilgen, alaıda osy ýaqyt ishinde sheteldik azamat ártúrli joldarmen sot sheshimin oryndaýdan jaltarǵan, ıaǵnı birneshe ret kasasıalyq shaǵym bergen, stasıonarda emdelgen. Sonymen qatar ol Qazaqstanda bolǵan kezinde birneshe ret ákimshilik jaýapkershilikke jáne bir ret qylmystyq jaýapkershilikke tartylǵan», - dedi Almaty qalalyq PD kóshi-qon qyzmeti basqarmasynyń bastyǵy Asqat Býtýnchınov.
Eske sala keteıik, Roman Alferov 2019 jyly pasıent ólimine kináli degen aıyppen sotqa tartylǵan bolatyn.
Sot úkimimen hırýrg 2,5 jylǵa bas bostandyǵynan aıyrylǵan. Alaıda qylmys jasalǵannan beri úsh jylǵa jýyq ýaqyt ótip ketkendikten ol bosatyldy.