Astanada nasybaı óndiretin jerasty sehy joıyldy.
Astanada quqyq qorǵaý organdarynyń qyzmetkerleri reıd barysynda 2 tonnadan asa nasybaı ónimin tárkilegen, dep habarlaıdy Almaty-akshamy.kz.
Polısıa departamentiniń qyzmetkerleri aýdan ákimdikterimen birlesip, shegilmeıtin temeki ónimderin satýdyń 70-ke jýyq deregin, onyń ishinde nasybaı óndirisi boıynsha jerasty sehtaryn anyqtaǵan.
"Reıd barysynda Baıqońyr aýdanynda polısıa qyzmetkerleri nasybaı óndiretin sehty tapty. Tárkilengen zańsyz ónimniń jalpy somasy 10 mıllıon teńgeden asady. Astana Polısıa departamentiniń qyzmetkerleri reıd barysynda Omarov jáne Asan Qaıǵy kósheleriniń qıylysyndaǵy jeke úıde 2 tonna nasybaı saqtalǵanyn anyqtady. Nátıjesinde zańbuzýshylarǵa 25 aılyq eseptik kórsetkish (AEK) mólsherinde aıyppul salý túrinde ákimshilik quqyq buzýshylyq týraly kodekstiń (ÁQBtK) 196-babyna sáıkes ákimshilik jaýapkershilikke tartyldy", - delingen habarlamada.