Elimizde «Nagradtalǵan analar» degen jańa uǵym paıda bolady.
Tolyǵyraq Úkimet basshysy Álıhan Smaıylov aıtyp berdi, dep habarlaıdy Almaty-akshamy.kz QazAqparatqa silteme jasap.
«Memleket óz kezeginde áıelderdi áleýmettik qoldaý máselelerine erekshe nazar aýdaryp otyr. Ana men balany qorǵaý, kásipker áıelderdi qoldaý, kóp balaly analarǵa, bala asyrap alǵan otbasylarǵa kómek kórsetý, áıelderdi jumyspen qamtýǵa járdemdesý, qarıalarǵa qamqorlyq jasaý memlekettik saıasattyń mańyzdy baǵyttary bolyp qala beredi», - dedi Álıhan Smaıylov Úkimet otyrysynda.
Sondaı-aq, Premer-Mınıstr jyl basynan beri bala kútimi boıynsha járdemaqy tóleý merziminiń 1 jyldan 1,5 jylǵa uzarǵanyn aıtty.
«Áleýmettik kodekste «Nagradtalǵan analar» degen jańa uǵym engiziledi. Bul mártebe kóp balaly analardy qurmettep, olardyń eńbegin dáripteý maqsatynda «Kúmis alqamen», «Altyn alqamen» marapattalǵan, buryn «Batyr ana» ataǵyn alǵan, «Ana dańqy» ordenderimen marapattalǵan áıelderge beriledi. Marapattalǵan analar úshin járdemaqy mólsheri saralanyp, ulǵaıtylady», - deıdi ol.
Onyń aıtýynsha, shamamen 90 myń ana joǵaryda atalǵan ıgilikke ıe bolady.