Olımpıada elimizdegi aýyl oqýshylaryna arnalǵan.
Buǵan qatysý úshin ótinimder 30 naýryzǵa deıin qabyldanady. Al testileý onlaın-formatta ótkiziledi, dep habarlaıdy Almaty-akshamy.kz.
Oqý-aǵartý mınıstrliginiń málimetinshe, oblystar boıynsha eń joǵary qorytyndy bal alǵan 5 myń oqýshy olımpıadanyń ekinshi kezeńinen ótedi.
«II kezeń 2023 jylǵy sáýir aıynyń 26 men 28 aralyǵynda óńirlik testileý ortalyqtarynda kúndizgi formatta ótedi. Qatysýshylar II kezeńde matematıkalyq saýattylyq, qazaq tili (qazaq tilinde oqıtyn oqýshylar úshin), orys tili (orys tilinde oqıtyn oqýshylar úshin), aǵylshyn tili jáne jaratylystaný pánderi boıynsha bilimderin baǵalaýǵa baǵyttalǵan kompúterlik testileýden ótý qajet. Aýyl mektepteriniń 6-synybynyń 500 oqýshysy – ótken jylǵy (2022 jyl) olımpıada fınalısteri osy jylǵy olımpıadanyń ekinshi kezeńine avtomatty túrde ótedi», - dedi «Daryn» respýblıkalyq ǵylymı-praktıkalyq ortalyǵy dırektorynyń uıymdastyrý qyzmeti jónindegi orynbasary Nurlan Jumageldi.
Atalmysh olımpıada aýyldyq jerlerde oqıtyn 6-synyptyń eń qabiletti 1000 oqýshysyna elimizdegi Respýblıkalyq fızıka-matematıka mektepterinde, «Bilim-Innovasıa» lıseılerinde, «Daryn» mamandandyrylǵan mektepterinde bilim alýǵa múmkindik beredi. Sondaı-aq olımpıadanyń bes myń fınalısi Birge oqý onlaın-mektebinde tegin oqı alady.
«1-kezeńde onlaın formatta logıkalyq suraqtar beriledi. Olar mekteptiń baǵdarlamasynda joq. Tipti ǵalamtordan kóshirip alý da múmkin emes. Bul kezeń onlaın formatta bolatyndyqtan suraqtar solaı qurastyrylǵan. Bastysy, balanyń test suraqtaryna eresekterdiń kómeginsiz ózi jaýap bergeni durys», - dedi «Myń bala» ulttyq zıatkerlik olımpıadasynyń úılestirýshisi Aıjan Arshabaeva.
Taǵy bir aıta keterligi, qatysýshylarǵa olımpıadanyń I jáne II kezeńderine daıyndalýǵa arnalǵan test tapsyrmalar úlgileri 100bala.elumiti.kz saıtynda jarıalanǵan.
Aıta keteıik, bul olımpıadaǵa elimizde sońǵy úsh jylda aýyl mektepterinen 590 myńnan astam oqýshy qatysty. Osy ýaqyt aralyǵynda 3 myń oqýshy jeńimpaz atansa, 960-y daryndy balalarǵa arnalǵan mektepterge qabyldandy.