«Salaýatty tamaqtaný mektebi» jobasyna – 10 jyl
Durys tamaqtaný mádenıetin balaǵa jastaıynan úıretý arqyly onyń densaýlyǵyna durys kútim jasaý daǵdysyn qalyptastyrý – ómir talaby. Salaýatty ómir saltyn qamtamasyz etý baǵytyndaǵy negizgi kórsetkishterdiń biri – balalardyń fızıkalyq jáne psıhologıalyq densaýlyǵyn qoldaý jáne jaqsartý. Memlekettiń bolashaǵy – deni saý urpaq. Al, osy urpaǵymyzdyń sapaly bilim alýyn qamtamasyz etip, jaıly jaǵdaı jasaý mektep muǵalimderine úlken jaýapkershilik júkteıdi.
Qazaq taǵamtaný akademıasy men densaýlyq saqtaý salasynyń ǵalymdary jasaǵan saraptamalarǵa júginsek, búldirshinder arasynda semizdikke boı aldyrý, asqazan aýrýy, dene músheleriniń durys qalyptaspaýy beleń alýda. Bul, árıne, durys tamaqtaný mádenıetiniń tómendigin ańǵartady.
Balalardyń densaýlyǵyna qatysty osyndaı keleńsizdikterdiń aldyn alý maqsatynda Almaty qalasy bilim basqarmasy QBBJTO, Qazaq taǵamtaný akademıasy jáne «Nestle fýd Qazaqstan» JSHS birlesip bastaýysh synyp oqýshylary úshin «Salaýatty tamaqtaný mektebi» jobasyn engizdi. Bıyl aıtýly jobaǵa 10 jyl bolady.
Osy ýaqyt aralyǵynda joba boıynsha Almaty qalalyq bilim basqarmasynyń bilim berý uıymdarynda aýqymdy jumystar jasalyp, qomaqty nátıjelerge qol jetkizildi. Atap aıtsaq, Almatynyń 30-ǵa jýyq mektebiniń bastaýysh synyptarynda eksperımenttik alańdar jumys jasaıdy.
Almatylyq ustazdar: «№ 78 mektep-gımnazıa» KMM dırektorynyń orynbasary Rozbakıeva Gúlmıra jáne bastaýysh synyp pedagogteri Handogına Allanyń avtorlyǵymen oqý baǵdarlamasy ázirlendi.
Jyl saıyn Almaty qalalyq bilim basqarmasy QBBJTǴÁO qoldaýymen «Salaýatty tamaqtaný mektebi» jobasyn júzege asyrý sheńberinde otandyq jáne sheteldik arnaıy mamandarmen onlaın kezdesýler, tájirıbe almasý semınarlary, trenıńter, qalalyq, respýblıkalyq, halyqaralyq deńgeıde festıvál, konkýrstar uıymdastyrylady. «Salaýatty tamaqtaný mektebi» jobasyna qala mektepteri men birge ata-analar da qyzyǵýshylyq tanytyp, qoldaý kórsetýde.
Mine, búgin biz aıtýly joba sheńberinde uıymdastyrylǵan is-sharalar men konkýrstarǵa qatysyp, birneshe ret júldeli oryndy ıelengen № 27 gımnazıaǵa kelip, bastaýysh synyp muǵalimderi: Derıganova Svetlana, Gorlenko Elena, Karıeva Andjelanyń «Salaýatty tamaqtaný mektebi» sabaǵyna qatysýǵa múmkindik aldyq. Sabaq barysynda oqýshylardyń durys tamaqtaný týraly túsinikteri men qyzyqty pikirleriniń kýási boldyq. Balalardyń durys tamaqtaný mádenıetiniń damýy jobanyń júzege asýynyń aıqyn dáleli ispetti.
Oqýshylardyń boıynda salaýatty ómir saltyn ustaný qajettiligin qalyptastyrý, óz densaýlyǵyn saqtaýǵa degen yntasyn arttyrýdy kózdeıtin jobanyń 10 jyldyǵyna oraı «Nestle Fýd Qazaqstan» JSHS jáne Almaty qalasy blim basqarmasynyń QBBJTǴÁO «Salaýatty tamaqtaný mektebi» baǵdarlamasy sheńberinde ádistemelik baıqaý jarıalady.
Almaty qalasy Bilim basqarmasynyń
QBBJTǴÁ ortalyǵy