Dástúrli shara bıyl balalar jylyna arnaldy
Almatydaǵy Ortalyq mýzeıde «Mýzeı túni-2022» sharasy aıasynda «Qaıta jarqyraǵan jaýharlar – Araly» atty kórme ashyldy, dep habarlaıdy Almaty-akshamy.kz Baq.kz-ke silteme jasap.
Atalǵan kórmege «Qyrym araly» ǵylymı-qalpyna keltirý zerthanasynyń Qazaqstan aýmaǵynda uıymdastyrylǵan qazba jumystarynyń negizinde tabylyp, qalpyna keltirilgen erekshe arheologıalyq artefaktiler halyq nazaryna alǵash ret usynyldy.
«Qyrym-araly» ǵylymı zerthanasynyń jetekshisi, Qazaqstannyń eńbek sińirgen qaıratkeri Qyrym Altynbekov kóne jádigerler bizdiń mádenıetimiz ben tarıhymyzdan syr shertetinin aıtady.
"Ata-babamyzdan qalǵan muralarǵa restavrasıa jasap, búgin halyq nazaryna usynyp jatyrmyz. Búgingi kórmege qoıylǵan jádigerlerdi mýzeıge kelýshiler birinshi ret kórip otyr. Óıtkeni ony menen basqa eshkim kórgen emes. Bul jádigerler zat túrinde bizdiń mádenıetimiz ben tarıhymyzdan syr shertedi. Búgingi kórmege 200-den astam jádigerler qoıyldy",- Q.Altynbekov.
QR Prezıdenti Qasym-Jomart Kemelulynyń 2022 jyldy «Balalar jyly» dep jarıalaýyna oraı, QR Memlekettik Ortalyq mýzeıiniń bıylǵy «Mýzeı túni-2022» dástúrli aksıasy talantty balalardyń bastamalary men jańashyl ıdeıalaryn qoldaýǵa baǵyttalǵan.
Atalǵan aksıanyń negizgi bóligi «Talantty balalar sherýi» respýblıkalyq balalar festıvaline arnalady. Festıvalǵa respýblıkamyzdyń ár óńirinen óner, sport, mýzyka, shyǵarmashylyq jaǵynan halyqaralyq, respýblıkalyq konkýrstar laýreattary men talantty jasóspirimder qatysty. Respýblıkalyq festıvál aıasynda 16 atalym boıynsha jas talanttarǵa marapatty elimizige belgili ǵylym, mádenıet jáne óner salasyndaǵy qaıratkerler tabystady.
Sondaı-aq Mýzeı túniniń basty oqıǵasy «Kovorkıng balalar ortalyǵynyń» ashylýy boldy. Ortalyqtyń jumysy balalardy mýzeı álemimen, ondaǵy tarıhı qundylyqtarmen tanystyrýǵa, shyǵaramashylyq bastamalar men balalardyń múmkindikterin ushtaýdy uıymdastyrýǵa baǵyttalǵan. Iaǵnı, balalardyń bos ýaqyttaryn tıimdi uıymdastyrý, múltıplıkasıalyq fılmder kórý, kitap oqý, qazaq ulttyq oıyndary jáne dástúrli mýzykalyq aspaptarda oınaýdy úıretý baǵyttarynda jumys isteý.
Sonymen birge «Jas ekskýrsovod», «Ólketanýshy» jáne «Birge sýret salaıyq» beıneleý óneri úıirmeleri ashyldy.
Mýzeı túni baǵdarlamasynda: jandanǵan ekspozısıalar, mýzeı qoryndaǵy sırek kezdesetin qarý-jaraqtar koleksıasy negizinde «Er qarý bes qarý» kórmesi (XVIII-XIX ǵǵ.), «Bizdiń talanttylarymyz», «Meniń baqytty balalyq shaǵym» atty qalalyq beıneleý óner stýdıalarynyń balalar shyǵarmashylyǵy kórmesi, belgili fotograf M. Zolotýhınniń fotokórmesi ashyldy.
Mýzeıge kelýshiler nazaryna konserttik baǵdarlamalar da usynyldy. J.Elebekov atyndaǵy Respýblıkalyq estrada-sırk koleji, «Kamerata Kazahstan» ansambli jáne Valentına Borovıkovanyń jetekshiligimen skrıpkashylar ansambli, O.Tańsyqbaev atyndaǵy Almaty sándik-qoldanbaly óner koleji men T.Q. Júrgenov atyndaǵy Qazaq Ulttyq Óner akademıasy stýdentteriniń sándik koleksıasynyń kórsetilimi jáne Qazaqstan-Japon ortalyǵynan orıgamı, kallıgrafıa, «fýroshıkı» óneri boıynsha sheberlik-sabaqtar ótti. Oǵan qosa merekelik is-shara qonaqtary memlekettik orkestrler men balalar ujymdarynyń mýzykalyq shyǵarmashylyq konserterin tamashalady.
Arnaıy balalar úshin Qazaqstan sýretshileri, sándik-qoldanbaly óner sheberleriniń qatysýymen sheberlik sabaqtary uıymdastyryldy.