Almatyda «Taza Qazaqstan» aksıasy aıasynda uıymdastyrylǵan «Almaty – ortaq úıimiz» tazalyq naýqany jalǵasýda.
Bul sharanyń basty maqsaty – qalanyń ekologıalyq jaǵdaıyn jaqsartý, aýa sapasyn baqylaý jáne turǵyndardy qorshaǵan ortany qorǵaýǵa yntalandyrý.
Búgin MýzArt life tobynyń jigitteri de ıgi sharanyń ortasynan tabyldy. Serikbolsyn Kishkenbaev pen Nurhat Segizbaı erekshe bastamaǵa atsalysyp, Túrksib aýdanyndaǵy №9 ekologıalyq beketke arnaıy bardy. Estradanyń juldyzdary ekologtarmen jáne jergilikti polısıa qyzmetkerlerimen birge aýa sapasyn baqylaý jumystaryna qatysty.
Ásem qalanyń aspany búgin shaıdaı ashyq. Mundaı qolaıly aýa raıynda qala aýmaǵyndaǵy tazalyq sharalaryna qatysty barlyq jumys ónimdi bolatyny sózsiz. Juldyzdar eki saǵat boıy ekoposttaǵy mamandarmen birge jumys istep, zıandy qaldyqtardy anyqtaıtyn quraldardyń kómegimen avtokólikterdiń gaz shyǵarý deńgeıin tekserdi. Bul bastama – tek ekologıa mamandarynyń ǵana emes, óner adamdarynyń da qorshaǵan ortaǵa janashyrlyqpen qaraıtynyn kórsetti.
Aýany qorǵaýǵa úles
Ánshiler kópkomponentti gaz taldaǵyshtardyń kómegimen benzın jáne gazben júretin avtokólikterdiń paıdalanylǵan gazdaryn tekserip, kómirsýtegi, kómirtegi oksıdi men dıoksıdiniń mólsherin anyqtaýǵa kómektesti. Osylaısha, olar ekologıalyq talaptarǵa saı emes kólikterdiń qala aýasyna tıgizetin zıanyn óz kózderimen kórip, pikir bildirdi.
– Almaty – biz úshin eń ádemi, eń sulý qala. Onyń taza aýasy, qorshaǵan ortasy biz úshin qashan da mańyzdy. Búgin ekoposttaǵy mamandarmen birge jumys istep, kólikterdiń tehnıkalyq jaǵdaıynyń ekologıaǵa qanshalyqty áser etetinin túsindik. Aýa – bárimizge ortaq, ony qorǵaý – árbir azamattyń mindeti. Barsha turǵyndardy kólikteriniń aqaýyn ýaqtyly jóndeýge jáne qorshaǵan ortany qorǵaýǵa jaýapkershilikpen qaraýǵa shaqyramyn, - deıdi «Mýzart-laıf» tobynyń ánshisi Serikbolsyn Kishkenbaev.
Al ánshi Nurhat Segizbaı bolsa, qalanyń ekologıalyq jaǵdaıyn jaqsartý úshin qoǵamdyq kólikti damytý men elektromobılderge kóshýdiń mańyzdylyǵyn atap ótti:
– Ekologıany qorǵaý – árbir azamattyń mindeti. Qalada tynys alý aýrýlary jıi kezdesedi, astma, bronhıt sekildi syrqattardyń basty sebebi – aýadaǵy zıandy zattar ekeni sózsiz. Bizge kólikterdiń ekologıalyq talaptarǵa saı bolýyn qadaǵalaý óte mańyzdy. Qoǵamdyq kólikti damytý, jasyl aımaqtardy kóbeıtý – qalamyzdy taza ustaýdyń negizgi joldary, - deıdi ónerpaz.
• Ekologtar ne deıdi?
Eski nemese jańa kólik dep bólmeımiz
«Rennesans plús» JSHS aǵa ekolog-operatory Ábdihamıt Amanquldyń aıtýynsha, Almaty qalasy boıynsha 19 ekologıalyq beket jumys isteıdi. Ótken jyly 204 myńnan astam kólik tekserilgen. Onyń ishinde 17%-y ekologıalyq talaptarǵa saı kelmegen.
– Biz júrgizýshilerdi eski nemese jańa kólik dep bólmeımiz, barlyq kólikter birdeı tekseriledi. Keıde jańa kólik eskiden de kóp zıandy qaldyqtar shyǵarady. Sondyqtan árbir júrgizýshi óz kóliginiń tehnıkalyq jaǵdaıyna muqıat bolýy qajet. Ekobeketter – aýany qorǵaýdaǵy mańyzdy qural, olardyń tıimdiligin arttyrý qajet, – deıdi ekolog.
Ekologıalyq bekette jumys istegen Mýzart-laıf tobynyń músheleri qorshaǵan ortany qorǵaýǵa úles qosyp jatqan mamandarǵa alǵys aıtyp, tazalyq sharasyna qatysýshylardy Kórisý kúnimen quttyqtady.
«Qala tazalyǵy – bárimiz úshin mańyzdy. Almaty jalǵyz, biz kóppiz. Sondyqtan ár azamat ekologıaǵa beıjaı qaramaýy kerek»,– dedi ánshiler.
Ekologıa – ortaq is. Almatynyń tazalyǵyn birge qorǵaıyq!
Ekologıalyq beketterdiń mańyzy
Ekobeketter qala ekologıasyn jaqsartýǵa úlken úles qosyp otyr. Olar:
✔️ Aýanyń lastaný deńgeıin tómendetedi;
✔️ Ekologıalyq talaptarǵa saı kelmeıtin kólikterdiń qozǵalysyn retteıdi;
✔️ Turǵyndardyń ekologıalyq mádenıetin arttyrady.