Qala tazalyǵyn saqtaýǵa arnalǵan sharaǵa qoǵam qaıratkerleri, óner jáne mádenıet ókilderi, eriktiler men qala turǵyndary belsendi qatysýda.
Búgin «Dostyq saıabaǵynda» ótken ekologıalyq aksıaǵa ár salanyń belgili tulǵalary jınaldy. Bul is-shara «Taza Qazaqstan» respýblıkalyq eko-aksıasynyń bastamasymen «Almaty – bizdiń ortaq úıimiz» naýqany aıasynda uıymdastyryldy.
Aksıanyń basty maqsaty – qorshaǵan ortany qorǵaý, kólikterden, óndiris oryndarynan jáne turmystyq qaldyqtardan keletin zıandy áserdi azaıtý, sondaı-aq qala turǵyndaryn ekologıalyq mádenıetke baýlý.
Ekologıalyq sharaǵa Memlekettik tildi damytý qorynyń atqarýshy dırektory, qoǵam qaıratkeri Bıjomart Qapalbek te qatysyp, óz pikirin bildirdi:
– Bul bastama óte quptarlyq. Biraq osyndaı aksıalar naýqanshyldyq sıpatynda qalyp qoımaýy kerek. Qorshaǵan ortanyń tazalyǵyn saqtaý – kúndelikti daǵdymyzǵa aınalýy tıis. Mysaly, japon halqy júrgen jerin árdaıym taza ustaıdy. Biz de osyndaı mádenıetti qalyptastyrýymyz qajet. Sonymen qatar, qaladaǵy eski aǵashtardy jańartyp, jasyl jelek kólemin arttyrý mańyzdy. Ásirese, qysy-jazy ottegi bólip turatyn arsha, shyrsha sekildi aǵashtar otyrǵyzylsa, tipti jaqsy bolar edi, – dedi ol.
Ortaq ıglikti maqsat etken sharaǵa óner ókilderi de salymyn qosýda.
– Qazaq halqynyń ulttyq dástúrine saı, kóktem tazalyqtan bastalady. Kópshilik bolyp tazalyqqa úles qosýǵa yqylas tanyttyq. Árkim aınalasynan bastasa, qala kelbeti de ózgeredi. Uqypty bolý – mádenıettiliktiń belgisi, – dedi ánshi Birjan Hasanǵalıev.
Ekologıalyq bastamalar qala turǵyndarynyń qorshaǵan ortaǵa degen jaýapkershiligin arttyrýǵa úlken úles qosary sózsiz.