Úndi opozısıasy Assam shtatynyń bıliginiń 1935 jyldan beri qoldanysta bolyp kelgen musylmansha neke qıý zańynyń kúshin joıǵanyn synǵa aldy.
Atalmysh zań kámelet jasyna tolmaǵan musylmandarmen nekelesýge múmkindik berip kelgen edi. Bul jaıynda islam.kz portaly óz kezeginde Reuters aqparat resýrsyna jón siltegen IslamNews saıtyna silteme jasaı otyryp málim etedi, dep habarlaıdy Almaty-akshamy.kz.
Assam – Úndistannyń barlyq shtattaryndaǵy musylmandardy qosa alǵanda musylman halqy kóp shtat. Osyǵan uqsas sheshim buryn Soltústik Ýttarakhand shtatynda da qabyldanǵan edi – atalǵan shtat aýmaǵyndaǵy barlyq nanym-senim ókilderine birdeı qoldanylatyn neke qıý, ajyrasý, bala asyrap alý, murager taǵaıyndaý isterin qamtyǵan biryńǵaı kodeks qoldanysqa engizilgen bolatyn. Assam shtatynyń jańa erejesine sáıkes 21 jasqa tolmaǵan jas jigitter otbasyn qura almaıdy. Qyzdardyń turmys qurý jasynyń jas shegi – 18.
Úndistannyń negizgi opozısıalyq partıasy sanalatyn ulttyq kongresi partıasynyń jetekshisi Ábráshıt Mandal atap ótkendeı, qabyldanǵan zań musylmandardy ǵana kemsitýǵa baǵyttalǵan. Bılik basyndaǵy ultshyl Modıdiń Bharatıa Djanata partıasy saılaýda jeńiske jetse, federaldy deńgeıde biryńǵaı «neke standarty» qabyldanýy múmkin. Búginde Úndistandaǵy ındýstar, musylmandar, hrıstıandar jáne basqa dinı birlestikterdiń neke, ajyrasý, bala asyrap alý jáne muragerlik máselelerinde ózderiniń zańdary men ádet-ǵuryptaryn ustanyp kelgenin aıta ketken jón.