Dárigerler dabyl qaǵyp otyr.
Qazaqstandyqtarda taǵy bir medısınalyq preparatqa táýeldilik paıda boldy, dep habarlaıdy Almaty-akshamy.kz Elorda.info saıtyna silteme jasap.
Bul jolǵy qaýip dárihana sórelerinde erkin satylatyn tynys alýdy jeńildetýge arnalǵan tamshylardan tónip tur. Jyldar boıy murynǵa tamyzatyn spreıdi úzdiksiz paıdalanýdyń sońy operasıaǵa alyp kelýi múmkin. Qazir mundaı naýqastardyń sany artqan. Muryn dárisine táýeldi bolǵandardyń biri – elordalyq Arnur Beısenbaev. Jaz kelip, kók shyǵa bastaǵanda, onyń alergıasy qozyp, tynys alýy qıyndaıdy. Alǵash ret murynǵa arnalǵan spreıdi osy mezgilde qoldana bastaǵan. Preparat bastapqyda kómektesedi, biraq keıin oǵan baılanyp, táýeldi bola bastaǵan.
«Murynmen durys demala almaımyn, sol kezde men naftızın alatyn boldym. Jáne ol ádetke aınalyp ketti, muryn bitelgende ala berdim, únemi qoldanatyn boldym. Arada biraz ýaqytta onsyz júre almaıtyn jaǵdaıǵa jettik», - dedi qala turǵyny.
Jalpy, mundaı máselege kezikken turǵyn kóp. Ádette, tynys alý múshesi mazalaǵandar jyldar boıy dárige táýeldi bolyp júredi. Dárigerlerdiń aıtýynsha, mundaı naýqastar arasynda balalar da bar. Murynǵa tamshy tıgennen keıin tamyrlar tarylyp, isiný basylady jáne tynys birden ashylady. Alaıda, bul dári aýrýdy emdemeıtinin eskergen jón. Ol bar bolǵany sımptomdy jeńildetedi.
«Tamyr tartqysh preparattardy uzaq ýaqyt qoldanǵan kezde ol jerde birinshi qan aınalymy buzylady. Jáne uzaq ýaqyt paıdalansa normada bólinetin suıyqtyqtyń konsıtensıasy da buzylady. Soǵan baılanysty gıpertrofıa paıda bolady. Iaǵnı, uzaq ýaqyt paıdalanǵan pasıentter ony alyp tastaıyn dese de, ala almaıdy. Óıtkeni, murynda isiný paıda bolǵan. Demalý qıyndaıdy, murynnan kóp suıyqtyq bólinedi. Ol sozylmaly bolady, soǵan baılanysty demalý qıyndaı beredi. Sosyn májbúrli túrde qoldana beredi», - dedi dáriger Serik Kóktebaev.
Mundaı dárilerdi 1 aptadan artyq paıdalanýǵa bolmaıdy. Eger 1 aı qoldansa, murynnyń shyryshty qabaty óledi. Al 1 jyl qoldansa, ony medısınalyq jolmen emdeý qıyndaıdy. Muryn tolyq bitelip qalýy múmkin. Mundaı jaǵdaıda ota jasatýdan basqa amal qalmaıdy deıdi dárigerler.
Bul preparattardy satyp alý qıyn emes. Kez kelgen dárihana sóresinde samsap tur.
Mundaı dárilerdi talapqa saı qoldansa, eshqandaı táýeldilikke alyp kelmeıdi. Eresekter kúnine 3 ret, 7 kún ǵana paıdalaný kerek kerek. Al balalarǵa 3 kún de jetedi. Árıne, kez kelgen dárini shekten tys paıdalansa keri áser etedi. Negizinen, murynǵa arnalǵan spreıler belgili bir ýaqytta ǵana kómektesedi, - dedi QR DSM dárilik zattar men medısınalyq buıymdardy saraptaý ulttyq ortalyǵynyń sarapshysy Gúljan Tastanova.
Dáriger Serik Kóktebaev mundaı preparattarǵa quzyrly organdar baqylaýyn kúsheıtýi kerek deıdi. Onyń aıtýynsha, dárini naýqasqa tek mamandardyń ruqsatymen satqan jón. Áıtpese, jaǵdaı ýshyǵa berýi múmkin.