Shahar ıgiligi úshin óte jaqsy bastama.
Qala kúni merekesinde pikirimen bólisken Qazaqstannyń eńbek sińirgen qaıratkeri Murat Qusaıynov Almatyǵa álemniń eshbir qalasy teń kelmeıtinin aıtty, dep habarlaıdy Almaty-akshamy.kz.
Ánshi Almatyda ótken ádemi estelikterimen bólisip, qala bolashaǵyna jasalyp jatqan jumystarǵa rızashylyǵyn bildirdi.
«Qala kúni qala úshin, turǵyndar úshin jańa saıabaqtar men sýburqaqtary ashyldy. Bul shahar ıgiligi úshin óte jaqsy bastama. Bizdiń jas kezimizden osy opera teatrynyń janyndaǵy saıabaq, ıaǵnı sýburqaq ashylǵan tusta óte kóp estelikterge toly. Óner adamdarymen, qaladaǵy ánshilermen birge saıabaqqa jıi kelip, demalatynbyz. Qabanbaı kóshesiniń boıynda ornalasqan saıabaq biz úshin ystyq. Qala ákimi Baqytjan Saǵyntaev sýburqaqtyń ashylýy kezinde bolashaqta qalanyń kórkeıýi úshin istelip jatqan jumystardy aıtyp, soǵan biz tánti boldyq», - dedi M. Qusaıynov.
Osy qalamen ózin kóp nárse baılanystyratynyn aıtyp, ystyq lebizin jetkizdi.
«Qala kúni qutty bolsyn! Almaty men úshin – altyn uıa. Meniń týyp ósken jerim. Almatymen meni óte kóp nárse baılanystyrady. Almatyda «Dos-Muqasan» quryldy, shańyraq kóterip, 3 balam da osy shaharda dúnıege keldi. Qazir nemerelerim de osy qalada ósip, jetilýde. Osy jasqa deıin álemdegi birneshe eldimekenderdi aralaǵan adammyn. Biraq, Almatyny eshbir qalaǵa teńeı almaımyn. Qala ákimi óz sózinde: «shahardyń burynǵy kelbetin múmkindiginshe, saqtap qalýǵa tyrysamyz» dedi. Osy sózi maǵan qatty unady», - dep aıtty ánshi.