Túrkistan oblystyq soty baspasóz qyzmetiniń málimetinshe, Túrkistan qalasynyń aýdanaralyq sotynda Qazaqstan Respýblıkasy Qylmystyq kodeksiniń 174-baby 1-bóligimen 2022 jyly sotty bolǵan Murat Ábdildaǵa qatysty usynym qaraldy, dep habarlaıdy aqshamnews.kz
Usynymda Saýran aýdandyq polısıa bólimi blogerdiń merziminen buryn shartty túrde bosatýdyń kúshin joıyp, jazanyń qalǵan ótelmegen bóligin bas bostandyǵynan aıyrý túrindegi jazaǵa aýystyrýdy suraǵan.
Sottalǵan Murat Ábdilda 2024 jyly sottyń qaýlysy negizinde qylmystyq kodekstiń 72-babyna saı bas bostandyǵynan aıyrý túrindegi jazasynyń ótelmegen 2 jyl 11 kúnin shartty túrde merziminen buryn bosatylyp, Túrkistan oblysynyń polısıa departametiniń Saýran aýdandyq polısıa bólimine profılaktıkalyq esepke alynǵan.
Profılıaktıkalyq esepte turǵanyna qaramastan, Murat Ábdilda 2024 jyly ortaq paıdalaný ornyn lastaǵany úshin ÁQBtK 434-2 babynyń 1-bóligimen ákimshilik jaýaptylyqqa tartylyp, oǵan aıyppul salynǵan. Sonymen qatar, 2025 jyldyń aqpan-naýryz aılarynda 5 ret tirkelýge kelmegeni jáne 4 ret túngi ýaqytta turǵylyqty mekenjaıynda bolmaǵany anyqtalǵan.
Murat Ábdildanyń kinási týystarynyń bergen túsiniktemelerimen, tıisti aktilermen jáne kýálerdiń jaýaptarymen tolyq dáleldengen. Ol óz kinásin ishinara moıyndap, sottan ózine taǵy bir múmkindik berýdi suraǵan.
Sot qaýlysymen:
Túrkistan oblysynyń Polısıa departamentiniń Saýran aýdandyq polısıa basqarmasynyń usynymy qanaǵattandyrylyp, Murat Ábdildanyń merziminen buryn shartty túrde bosatýdyń kúshi joıylyp, jazanyń qalǵan ótelmegen bóligi 2 jyl 11 kúnin bas bostandyǵynan aıyrý túrindegi jazaǵa aýystyryldy.
Murat Ábdilda sot zalynda qamaýǵa alyndy. Qaýly zańdy kúshine engen joq.
Budan buryn ol 2022 jyly QR QK 174-baby, ıaǵnı, áleýmettik, ulttyq, rýlyq, násildik alaýyzdyqty azamattardyń ulttyq ar-namysy men qadir-qasıetin qorlaýǵa baǵyttalǵan qasaqana áreketter jasaǵany úshin 4 jyl 6 aıǵa sottalǵan edi.