Ónerde shekara joq. Jaqynda Sankt-Peterbýrg Syrtqy baılanystar komıtetiniń bastamasymen jáne Reseı yntymaqtastyǵynyń qoldaýymen Sankt-Peterbýrgte «Murajaı tájirıbeleri: saqtaýdan bastap qatysýǵa deıin» atty kásibı damý baǵdarlamasy uıymdastyryldy. Bul baǵdarlamaǵa Almatydaǵy Ábilhan Qasteev atyndaǵy QR Memlekettik óner mýzeıiniń qyzmetkerleri de qatysty, dep habarlaıdy aqshamnews.kz
Sankt-Peterbýrg Syrtqy baılanystar komıtetiniń shaqyrýymen Qazaqstan, Belarýs, Tájikstan, Armenıa, Ázirbaıjan jáne Ońtústik Osetıa elderiniń 21 murajaıynan 34 maman jınaldy. Olar bir apta boıy Sankt-Peterbýrgtiń mádenı mekemeleriniń jumysyn zerttep, úzdik tájirıbelerimen tanysýǵa múmkindik aldy.
Baǵdarlama barysynda Reseıdiń saıası tarıhy Memlekettik mýzeıi negizinde qatysýshylar úshin dárister, sheberlik synyptary jáne semınarlar ótkizildi. Taqyryptar qatarynda murajaı qyzmetin esepke alý jáne saqtaý, murajaı zattary men koleksıalaryn sıfrlandyrý, eksponattardy sıpattaý ádisteri, halyqaralyq kórmeler uıymdastyrý, balalar baǵdarlamalaryn ázirleý jáne ótkizý, jańa aýdıtorıany tartý joldary syndy máseleler qamtyldy.
– Mándi ári mazmundy oqý baǵdarlamasy aıasynda biz Reseıdiń saıası tarıhy Memlekettik mýzeıine, Sankt-Peterbýrgtiń memlekettik tarıh murajaıyna, Petropavl bekinisine, Reseı etnografıalyq murajaıyna, «Baltyq úıi» teatr-festıvaline, Lenıngradtyń memlekettik qorǵanys jáne blokada memorıaldyq murajaıyna, tarıhı tárbıe berý Balalar murajaı ortalyǵyna jáne Reseı memlekettik óner murajaıyna bardyq. Bul bizge rýhanıat áleminen mol maǵlumat alýǵa múmkindik berdi. Jas mamandarǵa mundaı jobalar óte qajet. Úırengenimizdi ózimizde qoldanýǵa ázirmiz, – deıdi ónertaný magıstri, Ábilhan Qasteev atyndaǵy QR Memlekettik óner mýzeıiniń baspasóz hatshysy Aqbota Álimhojına.
