Memleket basshysynyń tapsyrmasy boıynsha mektepke deıingi bilim berýdi damytý jónindegi keshendi sharalardy iske asyrý sheńberinde elimizde bıylǵy jyldyń basynan bastap mektepke deıingi uıymdarda 40 myńǵa jýyq jańa oryn ashyldy.
Bul týraly OKQ-de ótken baspasóz máslıhatynda QR Oqý-aǵartý mınıstrliginiń Mektepke deıingi bilim departamentiniń dırektory Manar Adamova málimdedi, dep habarlaıdy aqshamnews.kz Oqý-aǵartý mınıstrligine silteme jasap.
Balalardy mektepke deıingi tárbıemen jáne oqytýmen qamtýdy arttyrý maqsatynda 2023-2027 jyldarǵa arnalǵan mektepke deıingi uıymdardy iske qosýdyń qadamdyq jospary ázirlendi, osylaısha balalardy mektepke deıingi sapaly bilimmen qamtý deńgeıi 91,5%-ǵa jetti.
«Jańa oryndardy ashý jumys istep turǵan mektepke deıingi uıymdardy rekonstrýksıalaý, jańadan salý, shaǵyn ortalyqtar jelisin keńeıtý, sondaı-aq jekemenshik mektepke deıingi uıymdarda memlekettik bilim berý tapsyrysyn ornalastyrý esebinen josparlanýda. Búgingi tańda Pavlodar oblysynda balalardy qamtýdyń eń joǵary kórsetkishine qol jetkizildi», – dep atap ótti Manar Adamova.
Esterińizge sala keteıik, elimizde barlyǵy 11,5 myńnan astam mektepke deıingi uıym jumys isteıdi jáne munda 1 mıllıonǵa jýyq bala tárbıelenýde. Bıyl 2 jastan 6 jasqa deıingi balalardy mektepke deıingi oqytýmen jáne tárbıemen qamtýdy 92,5%-ǵa deıin arttyrý josparlanyp otyr.