Álisher Temenov aqynnyń ulyna kóliginiń kiltin berdi, dep habarlaıdy aqshamnews.kz Orda.kz saıtyna silteme jasap.
Almatyda Naýryzbaı aýdandyq sotynda aqyn Muqaǵalı Maqataevqa til tıgizgen bloger Álisher Temenovke qatysty is toqtatyldy.
Temenovke Qylmystyq kodekstiń 131-baby 2-bóligi (Qorlaý) boıynsha aıyp taǵylǵan bolatyn. Bul isti sýdıa Beınekúl Qaısına qarady.
16 maýsymda ótken sot otyrysynda jábirlenýshi Juldyz Maqataev aıyptalýshyny keshirip, isti toqtatýdy surady. Ol blogerden moraldyq shyǵyn retinde on mıllıon teńge talap etken.
Sotta Temenov «eki jaq kelisimge kelgenin» aıtty.
"Kinámdi tolyq moıyndaımyn jáne keshirim suraımyn. Eki jaq kelisimge keldik, sol sebepti isti qysqartýdy suraımyn. Qazir kóligimde eki mıllıon teńge bar. Qalǵan bir mıllıondy on kúnnen keıin ákelip beremin. Oǵan deıin kóligimniń kiltin qaldyryp ketemin. Qalǵan aqshany bergen soń kóligimdi qaıta alamyn", – dedi ol.
Sýdıa sheshim shyǵarý úshin zaldan shyǵyp ketken sátte bloger eki mıllıon teńgeni qolma-qol berip, kóliginiń kiltin de jábirlenýshige tapsyrǵan.
Sot taraptardyń tatýlasýyna baılanysty isti toqtatyp, Temenovti qylmystyq jaýapkershilikten bosatty. Azamattyq talap ta toqtatyldy. Biraq, sot onyń «eshqaıda ketpeý jáne tıisti minez-qulyq» týraly qolhat túrindegi bultartpaý sharasyn kúshinde qaldyrdy.
Sonymen qatar, bloger Temenov óziniń áleýmettiń jelide aqyndy balaǵattaǵany úshin kúlli halyqtan keshirim surap beınejazba jarıalaýǵa ýáde etti.