Almatydaǵy Naýryzbaı aýdandyq sotynda Muqaǵalıdy "sorly erkek" degen bloger Álisher Temenovke qatysty is qaralyp jatyr, dep habarlaıdy aqshamnews.kz Sputnik Qazaqstan-ǵa silteme jasap.
Blogerdiń ústinen Muqaǵalı Maqataevtyń uly Juldyz Maqataev shaǵym túsirgen. Ol Temenovke qatysty Qylmystyq kodekstiń 131-baby 2-tarmaǵy "Qorlaý" faktisi boıynsha qylmystyq is qozǵaýdy suraǵan. Qylmystyq isti Almatynyń Naýryzbaı aýdandyq sotynda sýdıa Beınegúl Qaısına qarady.
Al Temenov advokat jaldamaq bolǵan, biraq áli tappapty. Ol sotqa resmı ókili Meıirman Shekeevpen keldi.
Álisher Temenov sot zalynda jýrnalıserdiń ózin túsirýine qarsylyq bildirdi. Blogerdiń resmı ókili sýdıaǵa sottaspaı-aq tatýlasýǵa kelip edik dedi.
"Bul eki kisi túptep kelgende týys. Bir atanyń balalary. Negizi Temenov óz áreketi úshin keshirim suraǵan, múmkin sizden keshirim suramaǵan shyǵar. Ózim de qarsy bolǵanmyn. Biraq bizdiń kómekke júgingen soń kómekteseıik dep sheshtik. Múmkin bolsa sizden keshirim surasaq dep edik", - dedi blogerdiń resmı ókili Meıirman Shekeev Muqaǵalıdyń uly Juldyz Maqataevqa.
Sýdıa 10 mınýt úzilis jarıalap, eki tarapqa tatýlasýǵa múmkindik berdi.
"Men kúızeliske tústim, bizdiń atymyzǵa nuqsan keltirdi, moraldyq shyǵyn keltirdi. 10 mln teńge moraldyq shyǵyn ótesin. Jelide keshirim surasyn. Ary qaraı kóremiz", - dedi Juldyz Maqataev sotta.
Al blogerdiń resmı ókili kelisip kóremiz degendi aıtty.
Byltyr 8 qazanda bloger Álisher Temenov áleýmettik jelide Muqaǵalı Maqataevty bylapyt sózdermen qorlap beınejazba jarıalady. Alaıda bloger beınejazbalaryn óshirip úlgergen, biraq vıdeo lezde halyqqa tarap ketti. Muqaǵalıdyń jerlesteri bul qorlyqqa shydamaı, Temenovtyń úıine deıin baryp, izdeý salǵan. Artynan bloger men ákesin Muqaǵalıdyń týǵan jeri Qarasazǵa aparyp, halyqtan keshirim suratty.
Álisher Temenov Almaty oblysy Uıǵyr aýdany Suńqar aýylynyń turǵyny. Ol sotta bir qyzy baryn jáne áıeliniń ekinshi balaǵa júkti ekenin aıtty. Turaqty jumysy joq, tek blogerlikpen aınalysady. Alǵash ret sottalyp jatyr.
Ol jýrnalıserge qandaı da bir ýáj aıtýdan bas tartty.
Al Muqaǵalıdyń balasy Juldyz Maqataev:
"Osy kúnge deıin aldyma kelip keshirim suramady. Kúızeliske tústim. Ákem Muqaǵalı "balam, meni halyq jamandasyn, óıtkeni pendemin, biraq meniń shyǵarmalarymdy jamandaǵan adamdy keshirmeımin" dep edi. Temenov ne úshin bulaı aıtqanyn túsindirmedi, biraq ókinetinin aıtty", - dedi Juldyz Maqataev.
Sot ary qaraı jalǵasady.