Premer-Mınıstri Álıhan Smaıylovtyń tóraǵalyǵymen ótken Otandyq kásipkerler keńesiniń otyrysynda munaı-gaz salasyn damytýdyń ózekti máseleleri men josparlary talqylandy, dep habarlaıdy Almaty-akshamy.kz BAQ.KZ-ke silteme jasap.
Jalpy, elimizde munaı-gaz salasy álemdik trendterge saı belsendi damyp keledi. Ol úshin óndiristiń tıimdiligin arttyrýdan bastap qaıta óńdeý óndiristerin keńeıtýge deıin qajetti sharalar qabyldanýda, – dedi ol.
Energetıka mınıstri Bolat Aqsholaqov baıandamasynda, geologıalyq barlaýǵa qosymsha ınvestısıalar tartý úshin kómirsýtekterdi, onyń ishinde gazdy barlaý jáne óndirý jónindegi kúrdeli jobalar úshin retteýshilik jáne fıskaldyq preferensıalar paketin kózdeıtin Jaqsartylǵan modeldik kelisimshart engizilgenin atap ótti. 2023 jyly ınvestısıa kólemi $6 mlrd bolatyn osyndaı alǵashqy kelisimshartqa qol qoıyldy. Investısıalyq qúny shamamen $2 mlrd-ty quraıtyn taǵy bir kelisimshartqa qol qoıý pysyqtalýda.
Budan basqa, salada elektrondyq aýksıondar ótkizýdi ońaılatý jóninde sharalar qabyldandy. Osy jyly ken oryndaryn jyldam qoldanysqa berý úshin jer qoınaýyn paıdalaný salasyndaǵy rásimderdi jeńildetý jumystary jalǵasady.
Munaı-gaz hımıasy ónerkásibi munaı-gaz sektoryn shıkizattyq baǵyttan qosylǵan quny joǵary ónim shyǵarýǵa qaıta baǵdarlaý sheńberinde belsendi damýda. Atap aıtqanda, ótken jyldyń sońynda qýattylyǵy 500 myń tonna polıpropılen óndiretin álemdik deńgeıdegi iri munaı-hımıa zaýytynyń biri iske qosyldy, ol respýblıkanyń ishki qajettiligin tolyǵymen jabýǵa múmkindik beredi. Qosymsha $12 mlrd ınvestısıa somasyna polıetılen, býtadıen jáne polıetılentereftalat óndirý boıynsha taǵy tórt iri joba iske asyrylyp otyr.
Aldaǵy ýaqytta Energetıka mınıstrligi ulttyq ekonomıkanyń túrli salalarynyń qajettilikterin munaı-gaz hımıa ónerkásibiniń múmkindikterimen ózara baılanystyrý jáne ımportty almastyrý, jańa ónimge standarttardy engizý, sondaı-aq normatıvtik bazany jetildirý jónindegi sharalar qabyldaýdy josparlap otyr.
Premer-Mınıstr bul qadamdardyń barlyǵyn jeke zańnyń ázirlenýin kútpeı-aq, zańǵa táýeldi aktiler deńgeıinde qabyldaý qajet ekenin atap ótti.
Otyrys barysynda qatysýshylar salyq salý, geologıany damytý, ekologıalyq talaptardy saqtaý, munaı eksporty, jalpy salanyń ashyqtyǵyn arttyrý jáne basqa da birqatar máselelerdi talqylady. Ár taqyryp boıynsha Energetıka mınıstrligi, Ekologıa mınıstrligi, Indýstrıa jáne basqa vedomstvolardyń basshylary egjeı-tegjeıli túsiniktemeler berip, pikirlerin bildirdi.
Premer-Mınıstr talqylaýdy qorytyndylaı kele, munaı-gaz salasynyń qarqyndy damýy búkil ekonomıka úshin mańyzdy úderis ekenin atap ótti. Osyǵan baılanysty ol qosymsha ınvestısıalar tartý úshin Jaqsartylǵan modeldik kelisimshartty qoldanýdy jedeldetý jáne bızneske ákimshilik qysymdy tómendetý boıynsha jumysty jalǵastyrý qajettigin jetkizdi.
Jaqyn arada munaı-gaz salasy boıynsha 800-ge jýyq túrli artyq talaptardy qysqartý josparlanýda. Bul sharalar bıznes-qoǵamdastyqpen jáne «Atameken» Ulttyq palatasymen tyǵyz baılanysta qabyldanýda. Úkimet budan ári de osyndaı syndarly negizde jumys isteýge daıyn, – dedi Premer-Mınıstr.
Qorytyndylaı kele, Álıhan Smaıylov Energetıka mınıstrligine otyrysta aıtylǵan usynystardy eskerýdi jáne memleket pen jeke ınvestorlardyń múddeleri arasyndaǵy teńgerimdi saqtaı otyryp, kóterilgen máselelerdi sheshý joldaryn tabýdy tapsyrdy.
Keńes otyrysyna ortalyq memlekettik organdardyń, «Atameken» UKP tóralqasy men negizgi komıtetteriniń basshylary, iri salalyq odaqtardyń, qaýymdastyqtar men jeke kompanıalardyń ókilderi, Qazaqstan kásipkerleriniń quqyqtaryn qorǵaý jónindegi ýákil jáne t. b. qatysty.