Kúntizbemizge Alǵys aıtý kúniniń engizilgenine bıyl segizinshi jyl. Bul – san túrli synaqtan ótken halqymyzdyń yntymaq-birligin aıqyndaı túsetin erekshe kún. Taǵdyrdyń tálkegimen elimizge qonys aýdarǵan túrli etnos ókilderin qushaǵy keń qazaq eli sol bir zamandarda ystyq baýyryna tarta bildi.
Keıingi ýaqytta qazaqsha sóıleıtin ózge ult ókilderiniń kóbeıgeni de zańdylyq. Sondaı-aq, elimizdiń áskerı qurylymynda da, ásker qataryna shaqyrylatyn jas sarbazdar arasynda da qazaq tilin jetik meńgergen ózge ult ókilderi jyl sanap artyp keledi. Solardyń biri – 5571 áskerı bóliminiń materıaldyq jáne tehnıkalyq qamtamasyz etý rotasynyń sarbazy Banadr Isaev.
Banadr naǵyz qazaqy óńir – Shymkentte dúnıege kelgen. Ulty – ázirbaıjan. Kórshi balalardyń bári qazaq bolǵandyqtan, oıyn kórigin de qazaqsha qyzdyrǵan. Mektep jasyna kelgende, ulynyń qazaq tiline degen qabiletin eskergen ata-anasy oılanbastan qazaq mektebine bergen. 2017 jyly otbasymen birge Astanaǵa qonys aýdarǵan. Ol jerde de qazaq mektebine baryp, orta mektepti sol jerde támamdaǵan.
Byltyrǵy mamyr aıynda Banadr áskerı boryshyn óteýge Ulttyq ulan qataryna shaqyrylady. Bir aılyq daıyndyqty tolyq kólemde aıaqtap, áskerı ant qabyldaǵan sarbaz jaýyngerlik bóliniske bólinedi. Qazirgi kezde áskerı qyzmetti jete meńgergen sarbaz, bólimdegi úlgili áskerı qyzmetshi, senimdi dos, mindetine adal jaýynger.
Áskerge deıin Kavkaz halqynyń bıine degen qushtarlyǵymen 6 jasynan bastap lezgınka bıimen aınalysqan. Bıdiń qyr-syryn jetik meńgergen Banadr 17 jasynda Astana qalasynda jeke bı zalyn ashyp, osy bı túrinen dáris bergen. Sondaı-aq, 18 jasynan «TikTok» áleýmettik jelisinde óziniń lezgınka bıimen tanymal bolǵan.
– Ózim kópultty otbasynan shyqqanmyn. Otbasymyz ýkraın, ázirbaıjan, túrik ultynyń ókilderinen quralǵan. Shańyraǵymyzda bárimiz derlik tek qazaqsha sóılesemiz. Kórshilerimizdiń bári qazaqtar boldy. Aýasyn jutyp, sýyn iship otyrǵan elin qurmetteıtin, qadirleıtin adam tildi de tez meńgeredi dep bilemin. Ońtústiktiń, onyń ishinde qazaqylyqtyń ıisi ańqyp turǵan Shymkenttiń topyraǵy men aýasy qazaq tilin erkin meńgerip alýyma áser etken bolar. Meniń tilim de, dinim de, janym da – taza qazaq. Men óz elimde erkin ómir súrip jatqanym úshin Qazaqstan halqyna, otbasymda meni sheksiz jaqsy kórip, bar meıirimimen tárbıelegen ata-anama, meni qoldap, árkez qasymda júrgen dostaryma, qarýlastaryma jáne quqyqtyq tártip áskeri – Ulttyq ulanǵa úlken alǵysymdy aıtamyn. Jaqyndarymyzǵa jaqsylyq jasap, bir-birimizge alǵys aıtyp júreıik, – deıdi qatardaǵy jaýynger Banadr Isaev.
Banadrdyń Almatyda ótkerip jatqan áskerı qyzmetin aıaqtaýyna úsh aı qalypty. Baǵyndyrar belesi de, shyǵar shyńy da áli alda dep bilemiz. Biz onyń otbasyna aman-esen oralyp, maqsatyna jetýine tilek qosamyz.