Qazaqstanda múmkindigi shekteýli jandardyń jumysqa ornalasýy qoǵam úshin mańyzdy taqyryptardyń biri. Ómirdegi túrli qıyndyqtarǵa qaramastan, eńbekke degen ynta men talpynys eshqandaı shekteýge moıynsunbaıtynyn dáleldegen jandar bar. Solardyń biri – Marına Shaposhnıkova.
Marına birinshi toptaǵy múgedek. Ol kórý qabiletinen aıyrylǵanyna qaramastan, bilim alýǵa jáne óz ornyn tabýǵa degen umtylysyn eshqashan joǵaltpaǵan. Polıtehnıkalyq kolejdi jáne Basqarý ınstıtýtyn qyzyl dıplommen aıaqtap, mamandyǵyn jetik meńgergen. Buǵan deıin býhgalter bolyp jumys istegen. Alaıda kórý qabiletin joǵaltqan soń, uzaq ýaqyt boıy jumys tabý qıynǵa soqty.
Qazir Marına arnaıy kitaphanada jumys isteıdi. Ol bul jerde tek eńbek etip qana qoımaı, ózi sekildi jandarmen baılanys ornatyp, jańa dostar tapty.
"Maǵan kitaphanada jumys istegen unaıdy. Munda men ózime jaqyn orta taptym. Jumysym qyzyqty, adamdarmen aralasamyn. Árıne, keıde jalaqy jetkiliksiz bolyp jatady. Biraq eń bastysy – ózime unaıtyn ispen aınalysý. Men úshin eńbek etý tek tabys kózi emes, ómirge degen qulshynys", - deıdi Marına Shaposhnıkova
Marına múmkindigi shekteýli jandardyń jumysqa ornalasý máselesinde basty róldi memleket pen qoǵamnyń qoldaýy atqaratynyna senimdi. Arnaıy baǵdarlamalar men múmkindikter kóbeıse, myńdaǵan adam óz ornyn tabatyny anyq.
Marına sıaqty jandardyń oqıǵalary – ómirdiń kez kelgen qıyndyǵyn eńserýge bolatynyn kórsetetin úlgi. Eńbek etýge degen ynta men talpynys eshqashan joǵalmasa, árdaıym jańa múmkindikterge jol ashylady. Janashyrlyq pen qoldaý kórsetilgen qoǵamda barlyǵynyń óz ornyn tabatyny sózsiz.