Apelásıa sot Tajıkbaevty 8 jyl bas bostandyǵynan aıyrdy
Almaty qalasynyń apelásıalyq sot alqasy Tajıkbaevqa qatysty úkimdi qaıta qarap, ony 8 jylǵa bas bostandyǵynan aıyrýǵa sheshim qabyldady. Tajıkbaev alǵashqy kezdesý kezinde Aınagúl Keńshebaevany óltirgeni úshin sottaldy, dep habarlaıdy aqshamnews.kz.
Bul qaıǵyly oqıǵa 2023 jyldyń qazan aıynda oryn alǵan. Keńshebaeva jańa tanysymen kafede kezdesken. Otyrys barysynda olardyń arasynda janjal týyndap, ekeýi syrtqa shyqqan. Tajıkbaev qyzdy bar kúshimen ıterip jibergen. Qyz aryqqa qulap, basyn urǵan. Alynǵan jaraqattardan qyz sol jerde jan tásilim etken.
Birinshi ınstansıa soty er adamdy «abaısyzda kisi óltirdi» dep tanyp, 2,5 jylǵa bas bostandyǵynan aıyrǵan bolatyn.
Keńshebaevanyń týystary bul jazaǵa kelispedi. Bir jyldan keıin, 2024 jylǵy 23 tamyzda Almaty qalasynyń apelásıalyq sot alqasy Tajıkbaevqa taǵylǵan úkimdi buzyp, oǵan 8 jyl bas bostandyǵynan aıyrý jazasyn taǵaıyndady.
Sot onyń áreketin «Abaısyzda jábirlenýshiniń ólimine ákep soqqan densaýlyqqa qasaqana aýyr zıan keltirý» baby boıynsha qaraǵan.