Álemdegi muhıttardyń temperatýrasy boıynsha jańa rekord ornady.
Dúnıejúzilik meteorologıa uıymnyń sarapshylary osyndaı málimdeme jasady, dep habarlaıdy Almaty-akshamy.kz 24.kz-ke silteme jasap. Ǵalymdardyń aıtýynsha, bul klımat ózgerýiniń taǵy bir belgisi. Muhıttyń jylynýy turmysymyzǵa qalaı áser etedi?
Bıylǵy jazda Atlant muhıtynyń temperatýrasy kóterildi. AQSH-tyń shyǵys jaǵalaýynda 38 jarym gradýsqa deıin ysydy. Ǵylymdar buǵan alańdap otyr. Jańa derekter jahandyq jylyný ekenin kórsetti.
Maıkl Sperroý, Dúnıejúzilik meteorologıa uıymy klımatty zertteý bóliminiń basshysy: - Ǵalymdar muhıttyń ysýy men teńizdegi muzdyń azaıýyna qatty alańdap otyr. Óıtkeni muhıttar kómirqyshqyl gazdyń aýaǵa taralatyn jylýynyń 90 prosentin ózine sińiredi. Soltústik Atlantıkada sý tym ystyq. Bizdiń boljamymyzdan edáýir joǵary. Bul ekologıalyq júıege, balyq sharýashylyǵyna jáne aýa raıyna áser etedi.
Jerdi kógildir ǵalamshar dep beker atamaǵan. Ǵalamnyń 70 prosentin sý aıdyny alyp jatyr. Soltústik jartyshardaǵy klımat negizinen muhıtqa táýeldi. Kómirqyshqyl gaz ony jylytyp, muzdyqtar erıdi. Al erigen tushshy sý Soltústik Amerıka men Eýropada jumsaq aýa-raıyn qamtamasyz etetin mańyzdy aǵystardyń aınalymyn ózgertedi. Danıa ǵalymdarynyń boljamynsha, 2050 jylǵa qaraı Gólfstrım aǵysynyń júıesi ózgeredi. Saldarynan, Eýropanyń soltústik batysynda qubylmaly aýa-raıy ornaıdy. Qysy sýyq, jazy qurǵaq bolady.
Antonıý Gýterrısh, BUU Bas hatshysy: - Qazirdiń ózinde klımat ózgerip jatyr. Bul tek bastaýy ǵana. Ǵalamdyq jylyný dáýiri aıaqtalyp, ǵalamdyq qaınaý dáýiri bastaldy. Búkil elder osyǵan daıyndalyp, óz halyqtaryn aptaptan, joıqyn sý tasqyndary, daýyldar, qýańshylyq pen órtterden qorǵaýy kerek.
Alaıda mundaı boljammen kelispeıtin ǵalymdar da bar. Olar tabıǵattyń tosyn minez kórsetýin qalypty qubylys dep sanaıdy. Degenmen, bıylǵy shilde zertteýler tarıhyndaǵy eń ystyq maýsym bolyp tirkeldi.