Qazaqstanda medısınalyq uıymdar medısınalyq-áleýmettik saraptamaǵa jiberetin azamattardy syrttaı proaktıvti formatta kýálandyrýǵa táýelsiz sarapshylardy tartý boıynsha pılottyq joba bastaldy.
QR Áleýmettik kodeksinde 2025 jylǵy 1 qańtardan bastap táýelsiz sarapshylar ınstıtýtyn tolyq kólemde engizý kózdelgen, dep habarlaıdy aqshamnews.kz.
Bıyl sáýir aıynda azamattardy kýálandyrý prosesine táýelsiz sarapshylardy engizý tetigin synaqtan ótkizý úshin Eńbek jáne halyqty áleýmettik qorǵaý, Densaýlyq saqtaý, Sıfrlyq damý, ınovasıalar jáne aeroǵarysh ónerkásibi mınıstrlikteri birlesken buıryq qabyldady. Ol úmitkerlerdiń testileýden ótý jáne talap etiletin qujattar toptamasyn usyný tártibin retteıdi. Negizgi talaptardyń biri joǵary medısınalyq bilim, densaýlyq saqtaý salasyndaǵy maman sertıfıkatynyń bolýy, sondaı-aq medısınalyq-áleýmettik saraptama júrgizý máseleleri boıynsha sońǵy 5 jylda oqýdan ótkenin rastaıtyn qujat bolýy. Osylaısha, táýelsiz sarapshylardy irikteý biliktilik deńgeıi men jumys ótili eskerile otyryp, konkýrstyq negizde júzege asyrylatyn bolady.
MÁS-ke táýelsiz sarapshylardy tartý boıynsha pılottyq jobany iske qosý sheńberinde konkýrsqa 50-ge jýyq adam qatysty. İrikteýdiń barlyq kezeńderinen 18 sarapshy dáriger ótip, jumysqa kiristi.
Saraptama mynadaı túrde júrgiziledi: medısınalyq qujattar memlekettik organdar men Densaýlyq saqtaý mınıstrliginiń aqparattyq júıelerinen alynǵan derekter negizinde sarapshyǵa avtomatty túrde elektrondyq jáne ıesizdendirilgen túrde túsedi.
İsterdi bólý eksaýmaqty tártippen júzege asyrylady. Bul Almatyda turatyn sarapshyǵa Almatydan basqa elimizdiń ózge óńirlerinen qujattar kelip túsetinin bildiredi.
Táýelsiz sarapshylar ınstıtýtyn engizý azamattardyń sarapshylarmen jáne tıisinshe sybaılas jemqorlyq quramdas bólikterimen tikeleı baılanysyn boldyrmaýǵa baǵyttalǵan.
Medısınalyq-áleýmettik saraptama rásimderin júrgizgennen keıin, múgedektik toby anyqtalǵan kezde, tıisti áleýmettik tólemder men arnaýly áleýmettik qyzmetterdi odan ári taǵaıyndaý ótinish berýshiniń qatysýynsyz proaktıvti túrde júrgiziledi.
Esterińizge sala keteıik, MÁS ótkizýdiń syrttaı formaty boıynsha pılottyq joba 2022 jyldyń 1 qańtarynan bastap Qazaqstannyń barlyq aýmaǵynda synaqtan sátti ótýde. Búgingi kúni syrttaı proaktıvti formatta kýálandyrý 30 nozologıalyq nysan boıynsha júrgiziledi. Jyl basynan bastap respýblıkanyń barlyq óńirlerinde 60,4 myńnan astam ótinim qaraldy.