QR Eńbek jáne halyqty áleýmettik qorǵaý mınıstrliginiń bastamasymen erekshe qajettilikteri bar adamdarǵa ınvataksı qyzmetin kórsetý úshin taksı agregatorlaryn paıdalaný jónindegi pılottyq joba bastalǵaly Astana men Almaty qalalarynda atalǵan qyzmet 25,9 myń ret kórsetildi.
Búgingi tańda Astana jáne Almaty qalalarynan pılottyq jobaǵa 441 adam qatysýda, dep habarlaıdy Almaty-akshamy.kz QR Eńbek jáne halyqty áleýmettik qorǵaý mınıstrligine silteme jasap.
Budan buryn habarlaǵandaı, ınvataksı qyzmetiniń sapasy men kórsetý jyldamdyǵyn arttyrý maqsatynda Eńbekmıni ákimdiktermen birlesip osy qyzmettiń mehanızmine ózgertý engizý týraly sheshim qabyldady. Mysaly, azamattarǵa qyzmet alýdan bir kún buryn telefon arqyly jazylý qajet, bul óz saparlaryn aldyn ala josparlaýǵa, ınvataksı berýdi kútýge májbúr etedi, ınvataksı qyzmetterin usyný úshin kólik quraldarynyń jetispeýshiligi jáne t. b. máseleler bar.
Sharttardy jeńildetý úshin osy qyzmetti kórsetýge qatysýǵa tıisti suranys alǵan taksı agregatorlaryn tartý boıynsha pılottyq joba júzege asýda.
Ádette agregator jasalǵan saparlardyń tólem aqysynan platformalarynyń paıdasyna belgili mólsherde paıyz aýdaratyn bolsa, mundaǵy basty shart sol paıyzdyń bolmaýy. Osy jumysty qoldaǵan Iandeks kompanıasy pılottyq jobaǵa óteýsiz negizde qatysýǵa nıet bildirdi.
Invataksı qyzmetin azamattar pılottyq joba sheńberinde Iandeks Go mobıldi qosymshasy arqyly qoldana alady. Jobanyń ereksheligi qyzmetti alýshy úshin kólikti tezirek tańdaý, onlaın rejıminde tapsyrys mártebesin qadaǵalaý jáne saparlardy baqylaýdyń qarapaıym júıesi. Bul qosymshada múgedektigi bar adamdar júrgizýshige sapardaǵy erekshe qajettilikteri týraly eskertýi úshin arnaıy múmkindikter ekrany iske qosyldy. Óz kezeginde júrgizýshiler adamdy kólikke otyrǵyzý jáne odan túsýde qalaı kómek kórsetýge bolatyn sekildi qajetti nusqaýlardy alady.
Pılottyq jobaǵa alǵashqy kezeńde Astana jáne Almaty qalalarynan múgedektigi bar adamdardyń fokýs-toby qatysady.
Qyzmet kórsetýdiń oń nátıjesi bolǵan jaǵdaıda jańa formatta múgedektigi bar adamdardyń basqa toptaryna jáne elimizdiń barlyq óńirlerinde júzege asady.