Muǵalimderdiń kásibı merekesine sanaýly kúnder qaldy. Bıyl Qazaqstanda alǵash ret muǵalimder kúni merekesi naqty 5 qazanǵa bekitildi.
Oqýshylar muǵalimder kúnine oraı ustazdaryna syılyq jasaı ala ma? Syılyqtyń AEK kólemi qansha bolýy kerek? Zańdy buzǵandarǵa qandaı jaza qoldanylady?
Bul týraly Almaty-akshamy.kz Massaget.kz-ke silteme jasaı otyryp habarlaıdy.
2020 jyly qazanda Memleket basshysy Qasym-Jomart Toqaev «Qazaqstan Respýblıkasynyń keıbir zańnamalyq aktilerine sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» Zańǵa qol qoıdy. Zań boıynsha memlekettik qyzmetshilerge jáne olardyń otbasy múshelerine syılyq berýshiniń paıdasy úshin syılyq, materıaldyq syıaqy jáne qyzmet kórsetýge tolyq tyıym salyndy.
«Sybaılas jemqorlyqqa qarsy is-qımyl týraly» Zańnyń 12 baby jáne «Memlekettik qyzmet týraly» Zańnyń 50 babyna súıensek, berý sebebine(mereke kúnderi, týǵan kún), sondaı-aq syılyqtyń túrine, sanyna, qunyna jáne ózge de sıpattamalaryna qaramastan(mysaly, tátti, kádesyılar) kez kelgen syılyqty berýge tyıym salyndy.
Buǵan deıin QR Oqý-aǵartý mınıstrliginiń burynǵy vıse-mınıstri Sholpan Karınova OKQ brıfıńi kezinde tilshiniń suraǵyna jaýap berip, syılyqtarǵa resmı túrde tyıym salynǵanyn eske salǵan edi.
«Biz bilim berý uıymdaryna mektep pen muǵalimderge syılyq berýge tyıym salynǵanyn resmı túrde aıtyp, habardar ettik. Kez kelgen syılyqqa tyıym salynady», - dedi Sholpan Karınova.
Sonymen qatar, Sybaılas jemqorlyqqa qarsy is-qımyl agenttiginiń Almaty oblysy boıynsha departamenti ókilderi muǵalimderdi syılyq alýdan bas tartýǵa shaqyryp, ustazdar qaýymy syılyqty alǵan jaǵdaıda jazanyń qalaı bolatynyn aıtty.
«Mektep dırektory úshin zańsyz materıaldyq syıaqy men para alý úshin ákimshilik jáne qylmystyq jaýapkershilik qarastyrylǵan», - delingen habarlamada.
QR Ákimshilik quqyqbuzýshylyq týraly kodekstiń 677 babyna sáıkes Ákimshilik sybaılas jemqorlyq quqyq buzýshylyq úshin jaýapkershilik sharasy — 600 AEK aıyppul, qylmystyq úshin QR Qylmystyq kodekstiń 366 baby - paranyń 20 eselengen somasy mólsherinde aıyppul salynyp, múlki tárkilenedi jáne 15 jylǵa deıingi merzimge bas bostandyǵynan aıyrylady.
Sondaı-aq, QR azamattyq kodeksine sáıkes muǵalimderge quny 10 AEK-ten asatyn syılyqtar berýge tyıym salynǵan. Zańbuzýshylyq tirkelgen jaǵdaıda, QR Qylmystyq kodekstiń 247 baby boıynsha 2 myń AEK-ke deıin aıyppul túrindegi qylmystyq jaýapkershilik kózdelgen.