Erbolat Dosaev Almaty pedagogtaryn Muǵalimder kúnimen quttyqtady
Almaty Theatre-da Muǵalimder kúnin toılaýǵa arnalǵan saltanatty is-shara ótti. Kásibı merekeni áriptester arasynda atap ótý úshin 600-den astam pedagog, eńbek ardagerleri, muǵalimder áýletteriniń ókilderi jáne t.b. keldi, dep habarlaıdy almaty-akshamy.kz
Qala ákimi Erbolat Dosaev is-shara qonaqtaryn merekemen quttyqtap, ıgi eńbekteri jáne jas urpaqty tárbıeleýge qosqan úlesi úshin alǵys aıtty.
«Muǵalim - bul mamandyq emes, bul borysh! Osy merekege sizderdiń jankeshti eńbekterińiz úshin, oqýshylardy bilim nárimen sýsyndatyp, ómirlik tájirıbelerińizdi bóliskenińizge sheksiz rızashylyǵymyzdy bildirý úshin ár joly erekshe tebirenispen kelemin. Qurmetti muǵalimder, bizdiń eń úlken mindetimiz – sizderdiń jumystaryńyzǵa jaǵdaı jasaý, biz balalarymyzǵa ozyq bilim berý úshin mamandardy daıarlaý men qaıta daıarlaýǵa ınvestısıa salýdy jalǵastyramyz. Sizderdi ómirimizdegi eń mańyzdy ári mártebeli merekeniń biri – Muǵalimder kúnimen shyn júrekten quttyqtaımyn!», - dedi qala basshysy.
Merekelik is-sharada «Almaty Ustazy» jáne «Úzdik bilim berý uıymy» baıqaýynyń jeńimpazdary marapattaldy. Qala mektepteriniń muǵalimderine QR Bilim mınıstrliginiń tósbelgisi tabystaldy.
Jas pedagogtarǵa arnalǵan «Almaty Ustazy» baıqaýy 2023 jyldyń 1 sáýirinen bastalyp, úsh kezeńde ótti. Onyń aıasynda 2,5 myńnan astam pedagog zamanaýı bilim berý úderisine ozyq ádistemeler men sıfrlyq tehnologıalardy engizý boıynsha daǵdysyn kórsetti. Jas muǵalimderdiń shyǵarmashylyq áleýetin ashý, muǵalim mártebesin arttyrý maqsatynda uıymdastyrylǵan baıqaýǵa úsh jyl ishinde 36 jasqa deıingi 7 myńǵa jýyq pedagog qatysty.
Megapolıs basshysy fınalǵa shyqqan bes pedagogqa Sıngapýrda oqý tájirıbesinen ótýge sertıfıkattar tabys etti.
Marapattalǵandar:
- Saltanat Anapıaeva - №159 mektep-gımnazıasynyń qazaq tili men ádebıeti pániniń muǵalimi («Til jáne ádebıet» baǵyty boıynsha).
- Eldar Ábdihalyqov – №168 jalpy bilim beretin mekteptiń tarıh pániniń muǵalimi («Adam jáne qoǵam» baǵyty boıynsha).
- Maıra Mahabaeva - №202 mektep-gımnazıasynyń bastaýysh synyp muǵalimi («Bastaýysh bilim berý» baǵyty boıynsha).
- Jansaıa Qydyrhanova - №206 mektep-gımnazıasynyń geografıa muǵalimi («Hımıa, bıologıa, geografıa» baǵyty boıynsha).
- Saltanat Esqojaeva - №24 lıseıdiń matematıka pániniń muǵalimi («Matematıka, fızıka jáne ınformatıka» baǵyty boıynsha).
Aıta keteıik, bas júlde ıegeri №159 mektep – gımnazıasynyń qazaq tili men ádebıeti pániniń muǵalimi Saltanat Anapıaeva 5 mln teńge kóleminde júldege ıe boldy.
Barlyq 5 jeńimpaz Sıngapýrda halyqaralyq bilim berý taǵylymdamasynan ótýge sertıfıkat alady, onda olar jetekshi mektepterdiń jumysymen tanysyp, sheteldik oqý oryndarymen tájirıbe almasady.
Ári baıqaýdyń 3 qatysýshysy №105 mektep-gımnazıasynyń ınformatıka pániniń muǵalimi Baqtıar Rozıev, №94 mektep-gımnazıasynyń orys tili men ádebıeti pániniń muǵalimi Dıana Krýkovskaıa, №134 mektep-lıseıiniń bıologıa pániniń muǵalimi Janna Hegaı jasampazdyǵy jáne shyǵarmashylyǵy úshin qala ákiminiń arnaıy syılyǵymen marapattaldy.
Sonymen qatar, is-sharada «Úzdik bilim berý uıymy» baıqaýynyń jeńimpazdary marapattaldy. Almaly aýdanyndaǵy S. A. Qojyqov atyndaǵy № 39 mamandandyrylǵan lıseıi eń joǵary bal (1671,43) aldy. Jeńimpazǵa bilim berý uıymyn materıaldyq-tehnıkalyq jaraqtandyrýdy jaqsartý jáne bilim berý prosesin ǵylymı-ádistemelik qamtamasyz etý úshin Almaty qalasy ákiminiń 56 mln teńge kólemindegi granty berildi.
Buǵan qosa, «Almaty mektebi» baǵdarlamasy boıynsha Shveısarıa men Ulybrıtanıanyń úzdik oqý oryndarynda bıyl 50 mekteptiń basshysy halyqaralyq akademıalyq taǵylymdamadan ótedi.