Almatyda bıyl mopedterdiń qatysýymen 359 jol-kólik oqıǵasy tirkeldi
Almaty polısıasy qalada kóktemgi-jazǵy kezeńde kóliktiń jekelegen túrleriniń qozǵalysyn baqylaýdy kúsheıtý sharalary qabyldanýda, bul qaladaǵy jol-kólik oqıǵalarynyń deńgeıine áser etýi múmkin, dep habarlaıdy aqshamnews.kz
Áńgime balamaly kólik quraldary týraly bolyp otyr, olardyń qataryna mopedter, motosıklder, skýterler, samokattar jáne taǵy basqa kólik túrleri kiredi.
Almaty qalalyq polısıa departamentiniń jergilikti polısıa qyzmeti basqarmasynyń bastyǵy Serik Shýmaevtyń aıtýynsha, mopedter men elektrosamokattardy tizgindegen adamdardyń sany artqan saıyn, olardyń qatysýymen jol qozǵalysy erejelerin buzý sany da ósken.
"Tájirıbe kórsetkendeı, mopedter men elektrosamokattardy júrgizetin adamdardyń sany kóbeıip, sonyń saldarynan olardyń qatysýymen jol qozǵalysy erejelerin buzý derekteri de artýda. Balamaly kólik túrlerin júrgizetin adamdardyń Qazaqstan Respýblıkasynyń Jol qozǵalysy erejelerin buzý derekterin anyqtaý boıynsha jumys kúsheıtildi. Aldyn alý sharalarynyń bir kúninde aldyńǵy sheptegi bólimsheler moped júrgizýshileri jasaǵan 150-den astam jol qozǵalysy erejelerin buzý deregin anyqtady," – dedi Shýmaev.
Sonymen qatar, ol jyl basynan beri Almatyda mopedter men elektrosamokattardyń qatysýymen 359 jol-kólik oqıǵasy tirkelip, nátıjesinde 364 adam zardap shegip, altaýy qaza tapqanyn atap ótti.