Mamandar ár kelýshiniń Ashyq qosymshasymen kirgen-kirmegenin baqylap, tekseris júrgizdi.
Almatyda karantın talaptaryn saqtamaıtyn kásipkerlik nysandar azaımaı tur. Sol úshin qalalyq shtabtyń mamandary kúni-túni reıd júrgizip, Túrksib pen Medeý aýdanynda ornalasqan birneshe meıramhananyń jumysyn áshkereledi, dep habarlaıdy Almaty-akshamy.kz Almaty.tv saıtyna silteme jasap.
Eń qyzyǵy, ustalǵan mekemelerdiń barlyǵynda ashyq baǵdarlamasy bolsa da, sanıtarlyq talaptar saqtalmaıdy.
Qalalyq shtabtyń mamandary ótken túni Túrksib aýdanyna qarasty Seıfýllın dańǵylynyń boıynda ornalasqan mekemeniń ústinen tústi. Mamandar ár kelýshiniń Ashyq qosymshasymen kirgen-kirmegenin baqylap, tekseris júrgizdi.
Bul mekeme ashyq baǵdarlamasymen jumys istese de, sanıtarlyq talaptar múlde saqtalmaǵan. Sebebi kelýshiler 50 paıyzdan artyq. Qazir mamandar anyqtalǵan faktiler boıynsha tıisti sharalardy júzege asyryp jatyr.
Keıin tekserýshiler mekemeniń qasyndaǵy taǵy bir meıramhana men Aqan seri kóshesiniń boıynda ornalasqan kásipkerlik nysannyń jumysyn áshkereledi. Munda da araqashyqtyq saqtalmaǵan.
«Qalanyń «qyzyl» aımaqta bolýyna baılanysty reıd jumystary kúsheıip jatyr. Qazirgi ýaqytta aýdanda 4 monıtorıńtik top jumys isteıdi. Ekeýi kúndiz, qalǵan ekeýi túnde shyǵady», – dedi Túrksib aýdandyq kásipkerlikti jáne ónerkásipti damytý bóliminiń basshysy Rústem Óserov.
Kóp uzamaı mamandar Ál-Farabı dańǵylynyń boıynda ornalasqan túngi bar men Bógenbaı batyr kóshesindegi meıramhanany anyqtady. Sebebi munda da ádettegideı araqashyqtyq saqtalmaǵany óz aldyna, kelýshiler karantındik shekteýlerdi elemegen. Esterińizde bolsa, bul mekemeler osyǵan deıin de birneshe márte tártip buzyp, kózge túsken edi.
«Aldaǵy ýaqytta Almaty qalasy boıynsha reıd jumystary jalǵasa beredi jáne ár aýdan, qala boıynsha 8 monıtorıńtik top jumys istese, ár aýdan boıynsha 4 monıtorıńtik top bar. Soǵan sáıkes, Almaty qalasynyń bas sanıtar dárigeriniń jáne QR bas sanıtarynyń qaýlylaryna qulaq asyp júrgen durys dep sanaımyn», – dedi qalalyq kásipkerler palatasynyń ókili Qýanyshbek Jaqsybek.
Osylaısha monıtorıńtik toptar ótken túni kóńil kóteretin oryndarda 14 tártip buzýshylyqty anyqtap, hattama toltyrdy. Aıta ketý kerek, qoǵamdyq oryndarda aýrý juqtyrýy yqtımaldyǵy óte joǵary.