Tarıhı qujat akademık Álkeı Marǵulannyń jeke muraǵatynda saqtalǵan.
Á. Marǵulan atyndaǵy Pavlodar pedagogıkalyq ýnıversıtetiniń tarıhshylary Keńes Odaǵynyń Batyry, Halyq qaharmany Baýyrjan Momyshulynyń Álkeı Marǵulanǵa tabystap ketken kartasyn anyqtaǵan, dep habarlaıdy Almaty-akshamy.kz
Atalmysh qujatty kópshilikke Marǵulan ýnıversıtetinde ótken konferensıa barysynda Margulan Centre arheologıalyq ortalyǵynyń qyzmetkeri Eńlik Ábeýova tanystyrdy.
Kartada Shymkent oblysynyń 1972 jylǵy ákimshilik terıtorıasy kórsetilgen. Atalǵan tarıhı qujatty Halyq qaharmany akademık Álkeı Marǵulanǵa 1973 jyldyń jeltoqsan aıynda bergen.
Kartanyń basty betine Baýyrjan Momyshuly óz qolymen:
Tarazyda – Tastarıa,
Saıramdaǵy Sansyzbaı,
Arystanda – Albarbarys,
Jýalyda – Jolbarys,
Túrkistanda – Túımenbap degen sózder bar bizdiń elde, sol sózderdiń tarıhtary tereń, astarlary jer astynda (arheologıa) jatqan bolar, - dep jazyp qoıǵan.
Al kartanyń artqy betine syzba men onyń qysqasha anyqtamasyn keltirgen, ıaǵnı ata-babalary boıynsha aqparat berilgen.
«Bul qujattyń búginde tarıhı mańyzy óte zor. Sebebi 60-tan asyp, 70-ke taıaǵan kezdegi eki taý tulǵanyń arasyndaǵy qarym-qatynasy, týǵan jerine, tarıhyna degen yqylasy sezilip tur. Baýyrjan Momyshuly jer ataýlary men batyr babalary boıynsha aqparatpen bólise otyryp, ári qaraı zertteýge, tarıhty zerdeleýge, jańa maǵlumattar alýǵa qolqa salyp otyrǵandaı», - dedi Eńlik Qabykenqyzy.