Móldir men Aısholpan nege kelispeı qaldy?

Ázilkesh Tursynbek Qabatovtyń áıeli, prodúser Móldir Muqanova men aıtysker aqyn Aısholpan Tileýtaı arasynda daý týyndady, dep habarlady Almaty-akshamy.kz.

Ánshiniń prodúseri bolǵan Móldir Muqanova Aısholpanmen ne úshin kelisimshartty jalǵastyrmaǵanyn Asqat Sadyrbaı men Perızat Myrzahmet júrgizetin podkastta aıtty. Bul málimdemege keıin Aısholpan Tileýtaıdyń ózi paraqshasynda vıdeo arqyly jaýap berdi.

Móldir Muqanova Aısholpanmen jumys isteý qalaı bastalǵanyn aıtty.

«Aısholpan maǵan ózi keldi. Halyqqa renjı beredi eken. Óziniń jerles aıtysker ápkerleri – Aınur Tursynbaeva men Sara Toqtamysovaǵa degen renishin aıtty. Áńgime arasynda negizi sol kisiler qoldaý kerek edi, biraq siz kómektesip júrsiz dep qalatyn. Sóıtip, 5 jylǵa kelisimshart jasap, prodúseri boldym», - deıdi Móldir Muqanova.

Onyń aıtýynsha, kelisimsharttyń eki pýnktin alyp tastaǵan. Bireýi – kúıeýge shyǵýǵa bolady, ekinshisi – salmaq qosa berseń de, eshteńe aıtpaımyn degen ruqsat.

«Salmaq qospaý týraly shart bolsa da, oryndalmas edi. Ony men ózim bilgen soń aıtyp otyrmyn.  Basynda barlyǵy ádemi boldy. Konsertterge shyqty.  Bir kúni Aısholpan joǵalyp ketti. Tappaı qaldyq. Sosyn 3-4 kúnnen keıin jylap-eńirep keldi. «Keshirińiz, qatelestim, qaıtadan jumys isteıik» dep aıtty. «Jaraıdy» dep keshirdim, - deıdi prodúser.

Onyń aıtýynsha, Aısholpan budan keıin taǵy bir ret joq bolyp ketken. Telefonyn óshirip tastaǵan. Móldir Muqanova onyń sebebin bilse de, aıta almaıtynyn aıtty.

«Sol ýaqytta ne isteıtinin bilmeımin. Óziniń jeke ómiri. Jas qyz, turmysqa shyǵýy kerek. Bulaı júrýine bolmaıdy. El aldynda júrgen adam joq bolyp ketkende, ne isteıtinin bilsem de, aıta almaımyn», - deıdi Móldir Muqanova.

Kelisimshart sol kúıinde qalǵan.

Bul jaǵdaıdaǵa qatysty aıtysker Aısholpan Tileýtaı áleýmettik jelide óz nusqasyn aıtyp, vıdeo jarıalady. Ol ataǵandaı, prodúser oǵan aqy tólemegen.

«Bul — taǵy da ádildik talap etetin vıdeo. Men buǵan jaýap bermeıin dep edim, alaıda oqyrmandar suranysy boıynsha jaýap berýge týra keldi. Meniń burynǵy prodúserim, ataqty Tursynbek Qabatovtyń jary Móldir hanym maǵan jala jaýyp, suhbat bergenin bárińiz kórdińizder. Janyndaǵy jýrnalıser meniń dene bitimime tıisip, mysqyldap kúlip otyrǵanyna qatty namysym ustap, júregim aýyrdy. Meniń de namysym bar, ony taptatpaıtyn qyzbyn. Ótkende aıtqandaı, men eshkimnen qoryqpaımyn», - dedi Aısholpan.

 Ol Astanaǵa arman qýyp kelgenin aıtty.

«Jas bolǵan soń, boıymda jalyn bolǵan soń, Astanaǵa keldim. Ákem — kúzetshi, anam — ustaz. Sizder sıaqty asyp-tasyp jatqan baılyǵym joq. Ata-anamnyń úmitin aqtaý úshin Astanaǵa keldim. Móldir hanymǵa jylap-eńirep barmadym, Móldir hanym maǵan kelip, jumys isteýdi usyndy. Astanada meni qoldaıtyn, qorǵatyn adam bar eken dep kelisimshartqa otyrdyq. Kelisimshart boıynsha Tursynbek aǵa men Móldir hanym «Ázil álemine» shyǵaryp, kınoǵa túsirýi kerek edi, konsertpen jáne kıimmen qamtamasyz etip, aılyǵymdy ýaqytyly tólep otyrýy kerek bolatyn. Ókinishke qaraı, bul kisiler 5 talaptyń bireýin de oryndaǵan joq», - dedi ol.

Aıtysker aqyn jaz boıy baı-manaptardyń, mınıstrlerdiń toıyna tegin án salyp, aıaǵynda aqshasyn bermeı qoıǵanyn aıtty.

«Bir mınıstr aǵamyz dombyra syılaǵan edi, ony Móldir hanym «saǵan bere almaımyn, men arqyly aldyń» dep óziniń úıine qoıdy. «Osyndaı adamdarmen qalaı jumys isteımin» dep telefonymdy almaı qoıdym. «Aısholpanǵa bir kostúm tigip bergen edim, sol kostúmdi áli kıip júr» degenin estidim. Móldir hanym, eger siz jobaǵa kostúm tigip berseńiz, ol – sizdiń prodúserlik mindetińiz. Eger kostúm tigip bere almasańyz, prodúser bolmaı-aq qoıyńyz. Tursynbek aǵa men Móldir hanym, maǵan tólemegen aılyqpen baıyp kete qoıyńyzdar. Meniń mazamdy almańyzdar, aıaqtan shalmańyzar, ótirik aıtyp baıbalam salmańyzdar»,- dep jaýap berdi ol.