Majarstan astanasy Býdapeshtegi WKF karateden álem chempıonaty Qazaqstan úshin tarıhı nátıjemen este qaldy, dep habarlaıdy almaty-akshamy.kz QR Týrızm jáne sport mınıstrligi Sportty damytý dıreksıasynyń baspasóz qyzmetine silteme jasap.
Kýmıte baǵdarlamasynda 50 kg deıingi salmaqta Ulttyq qurama sportshysy Móldir Jańbyrbaı eshkimge des bermedi. Ol fınalda tájirıbeli ıtalıalyq Ermınıa Perfettoǵa esh múmkindik bergen joq.
Móldir jartylaı fınalda álem reıtıńiniń kóshbasshysy Salazar Iorgelısti (Venesýela) aıqyn basymdyqpen tize búktirip, sensasıa jasaǵan. Al oǵan deıin Hanchjoýdaǵy Azıa oıyndarynyń kúmis júldegeri 3-seksıada Aljır, Japonıa, Slovakıa karateshisin qapy qaldyrǵan. Bul salmaqta Býdapeshte 56 eldiń tańdaýly atleti kúsh synasty.
Móldir sporttyń osy túrinen eresekter arasynda álem chempıony atanǵan tuńǵysh qazaq. Osyǵan deıin 2008 jyly Darhan Asadilov fınalǵa jetip, qarsylasyna ese jibergen.