Eldegi jáne «Altyn Orda» bazaryndaǵy baǵa ahýaly qaraldy.
Ótken senbide Premer-Mınıstrdiń orynbasary – saýda jáne ıntegrasıa mınıstri Serik Jumanǵarınniń tóraǵalyǵymen ótken áleýmettik mańyzy bar ónimderdiń baǵasyn turaqtandyrýǵa arnalǵan aptalyq keńes ótti, dep habarlaıdy Almaty-akshamy.kz Úkimettiń resmı saıtyyna silteme jasap.
SIM saýda komıteti tóraǵasynyń mindetin atqarýshy Aıdar Ábildabekov atap ótkendeı, «Altyn Orda» bazarynda mobıldi top quryldy, onyń quramyna QMA, SIM, BQDA, QM MKK, İİM, DSM, TJM, ASHM, Almaty oblysy ákimdiginiń ókilderi kiredi. Top qazirdiń ózinde bazarda táýlik boıǵy kezekshilikke kiristi. Satýshylar, jetkizýshiler, júrgizýshiler men bazarǵa kelgen azamattardyń ótinishterin qabyldaý jáne jedel jaýap berý úshin «Altyn Orda Open» Telegramm-chaty men biryńǵaı baılanys ortalyǵy (call center) (8 7273 195 160, 8 747 059 7054) quryldy. Kókónis ónimderin bazarǵa kelýshilerge tikeleı ótkizetin sharýalardyń júk kólikteri úshin tegin 100 oryn belgilendi. Saýda núkteleri shatyrlarmen jabdyqtalǵan, turaqty baqylaý úshin kameralar ornatylǵan. Bul sharýalarǵa aýyl sharýashylyǵy ónimderin tutynýshylarǵa tikeleı deldalsyz satýǵa múmkindik beredi. Bazarda saýda jasaý úshin sharýalar aýyl ákimdiginiń anyqtamasyn alýy qajet.
«Almaty oblysynyń ákimdigi mobıldi toptyń jumysyn kúndelikti baqylaýda ustaýy qajet. Júk kólikterine arnalǵan 100 oryn – jazǵy maýsymǵa ońtaıly jedel shara. «Altyn Orda» aýmaǵynan stasıonarlyq saýda nysandaryna oryn bólý qajet. Bul tek osy bazarǵa ǵana qatysty emes, barlyq ákimdikterge óz óńirlerindegi bazarlar men iri saýda nysandarynda osyndaı jumys júrgizýdi tapsyramyn», — dedi Serik Jumanǵarın.
Keńeste deldaldyq sqemalardy joıý jaǵdaıy da qaraldy. Saýda komıtetiniń málimetinshe, jyl basynan beri komısıalardyń 859 otyrysy ótkizilip, 176 ónimsiz deldal alynyp tastaldy. Apta ishinde saýda ústemesin asyryp, ónimsiz deldaldardy alyp tastaýdyń 22 faktisi anyqtaldy. Atap aıtqanda, Jambyl oblysynda 15%-dan joǵary saýda ústemesi bar tútikti kespe, un jáne kúrish satyldy. Túsindirý jumystarynan keıin bul ónimderdiń baǵasy 10-25% sheginde tómendedi.
«Ulytaý oblysynda saýda ústemeaqysyn asyrǵany úshin kásipkerge eskertý jasaldy. Nátıjesinde kúnbaǵys maıy men qyryqqabattyń baǵasy 25%-ǵa tómendedi», — dedi Aıdar Ábildabekov.
Jalpy, ótken aptada áleýmettik mańyzy bar azyq-túlik taýarlary baǵasynyń ósimi 0,1%-dy qurady. Baǵanyń eń joǵary ósmi sábizde (4,4%) jáne kartopta (3,5%) boldy. Sonymen qatar qyryqqabat (-5,4%), pıaz (-1,6%) baǵasynyń tómendeýi baıqalady. Kúnbaǵys maıy (-1,7%), qaraqumyq (-1,5%), jumyrtqa (-1,4%), qus eti jáne tuz (-0,1%) baǵasynyń tómendeýi jalǵasyp otyr.
Sábiz baǵasynyń ósýine qatysty jaǵdaı bólek taldandy, olar boıynsha eń joǵary ósý ındeksi 18 óńirde belgilendi. Belgili bolǵandaı, buǵan deıin óńirlerge Tarazdaǵy óndirýshiden sábizdi 110 teńgeden satyp alý usynylǵan bolatyn. Alaıda, satyp alýdy tek Astana men Almaty qalalary ǵana júrgizgen.
Aýyl sharýashylyǵy vıse-mınıstri Erbol Tasjúrekov kúzgi-qysqy kezeńge arnalǵan óńirlik turaqtandyrý qorlaryn qalyptastyrý boıynsha júrgizilip jatqan jumystardyń nátıjelerimen tanystyrdy. Qazirdiń ózinde 77,6 myń tonna kóleminde kúzgi kartopty nemese aldaǵy kúzgi-qysqy kezeńdegi tutyný normasynyń 85%-y, 23,5 myń tonna sábiz (91%), 22,3 myń tonna pıaz (91%), 16 myń tonna qyryqqabat (74%) jetkizýge sharttar jasaldy.
«ÁMAT baǵasyn turaqtandyrý tetikterin engizýdiń úlgilik qaǵıdalaryndaǵy sońǵy ózgeristerdi eskere otyryp, ÁKK-niń bos qarajaty aýyl sharýashylyǵy taýaryn óndirýshiler men qaıta óńdeý kásiporyndaryn forvardtyq qarjylandyrýǵa baǵyttalýy kerek. Kelisimsharttardyń eń az kólemi bar óńirler fermerlermen forvardtyq kelisim-sharttar jasaý sharalaryn qabyldaýy qajet. Kartop, sábiz, pıaz, qyryqqabat óndirýshileriniń tizimi ákimdikterge joldandy», — dedi aýyl sharýashylyǵy vıse-mınıstri.
Jıyndy qorytyndylaǵan Serik Jumanǵarın Aýyl sharýashylyǵy mınıstrligine ákimdikter jasaǵan kúzgi egin jınaý jumystaryna qatysty barlyq kelisim-sharttardyń úlgilik erejelerdegi jáne qarjy aǵyndary boıynsha ózgeristerge sáıkestigi turǵysynan tekserýdi tapsyrdy.
«Ózgerister tek óndirýshilerden 9 taýar pozısıasyn satyp alýdy talap etedi. Tekserý nátıjeleri bir apta merziminde baıandalsyn», — dedi Serik Jumanǵarın.