Búginde eldegi bankter qyzmettiń basym bóligin avtomattandyryp jatyr.
5 jylda Qazaqstanda mobıldi bankıng arqyly jasalatyn ınternet-tólemder úlesi 23%-dan 83%-ǵa artty, dep habarlaıdy Almaty-akshamy.kz
Ekinshi deńgeıli bankterdiń onlaın-servısterin paıdalanatyndar sany artqan. Mysaly, 2 jylda olardyń sany 2 ese ósip, bıyl 39,5 mln boldy (2020 jyly – 28,7 mln, 2019 jyly – 19,7 mln). Qazirgi tańda banktiń onlaın qyzmetiniń ený deńgeıi oń dınamıkany kórsetip otyr.
Qazaqstanda árbir ekonomıkalyq belsendi turǵyn otandyq bank usynatyn 4-ten asa onlaın-servısti paıdalanady. 2 jyl buryn bul kórsetkish 2 qyzmetten sál ǵana asatyn. Elde bıometrıalyq sáıkestendirýdi engizý qashyqtan qyzmet kórsetý servısterin paıdalanýdyń draıverine aınaldy.
Búginde mobıldi qosymshalar arqyly bank qyzmetterin paıdalanýǵa bolady. Google Play dereginshe, búginde úzdik bank mobıldi qosymshasynyń kóshbasynda Jusan (Jusan Bank) tur. Qosymsha kóptegen baǵytty, onyń ishinde bank ózi usynatyn, ári saqtandyrý jáne baǵaly qaǵazdar naryǵynda jumys isteıtin Jusan ekojúıesiniń enshiles uıymdarynyń qyzmetterin qamtıdy, ári onda «Jusan dúken» marketpleısi de bar. Ekinshi orynda Halyk Homebank (Halyk Bank) qosymshasy tur. Úshindi orynda – Kaspi.kz mobıldi qosymshasy.
Sońǵy jyldary qolma-qol aqshasyz tólemder kólemi 2 ese artqan. 2021 jyldyń qorytyndysy boıynsha Qazaqstandaǵy qolma-qol aqshasyz operasıalardyń negizgi úlesi ınternet/mobıldi bankıng arqyly jasaldy: 83,4% nemese 60,1 trln teńge. Bes jyl buryn onlaın-tólemder úlesi 23,2% bolǵan.