Aldymen býyndyrylyp óltirilgen boıjetkenniń denesi tabylǵan
AQSH-ta taýǵa ketip, joǵalyp ketken saıahatshy blogerlerdiń tarıhy dramalyq sıpat ala bastady. Federaldy tergeý basqarmasy bloger Braın Londrıdiń óli denesi men jeke zattaryn tapty. Buǵan deıin onyń janynda bolǵan boıjetken Gabbı Petıtonyń tunshyǵyp ólgen múrdesin tapqan edi. Qalyndyǵynyń ólimine jas blogerdiń qatysy bar ma jáne onyń ózi neden kóz jumdy?
Qazir búkil Amerıka osy jaǵdaıdy talqylap jatyr. Óıtkeni bul jaıt gollıvýdtyq fılmniń senarıine uqsas. Degenmen, is júzinde ne bolǵanyn eshkim bilmeıdi, saıahatshy juptyń arasynda naqty qandaı jaǵdaı bolǵany jumbaq kúıinde qalyp otyr, dep habarlaıdy Almaty-akshamy.kz
.
«Vestı» telearnasynyń málimetinshe, 23 jastaǵy Braıan Londrıdiń ata-anasy polısıaǵa ulyn izdeýge kómektesken, nátıjesinde ulttyq saıabaqtan onyń múrdesi men jeke zattary tabylǵan. Qazir bul isti tergeýmen eldegi FTB-y aınalysyp jatyr.
«Bizdiń tergeý tobymyz oqıǵa bolǵan jerde tergeý amaldaryn júrgizip jatyr, olar sol aýmaqty túgeldeı tekserý úshin barlyq krımınaldyq resýrsty paıdalanýda. Jumys toby ol jerde áli birneshe kún jumys isteýi múmkin. Barlyqtaryńyzda suraq kóp ekenin bilemin, biraq bizde áli naqty jaýap joq. Kókeıimizdegi suraqtardyń barlyǵyna jaýap tabý úshin biz tynymsyz jumys istep jatyrmyz»,-dedi FTB-nyń arnaıy agenti Maıkl Makferson.
Iá, blogerlerdiń jumbaq ólimine qatysty suraq jýrnalıser men tergeý qyzmetinde ǵana emes, marqumdardyń áleýmettik jelidegi jazylýshylarynda da kóp. Gabbı Petıto men Braıan Londrı osydan birneshe aı buryn AQSH boıynsha saıahat jasaýǵa attanady. Olar barǵan jeri týraly málimetterdi áleýmettik jelige jarıalap, áserlerimen bólisip otyrǵan. Alaıda boıjetken kenetten joǵalyp ketedi. Sapardyń birinen oralǵan onyń ǵashyǵy Gabbı jaıly aıtýdan bastartady, artynsha ózi de joǵalyp ketedi. Arada birneshe kún ótkende býyndyrylyp óltirilgen qyzdyń denesi ulttyq saıabaqtan tabylady. Mine, arada eki aıdaı ýaqyt ótkende jigittiń denesi men jeke zattary da tabyldy. Polısıa jigittiń múrdesi tabylǵan jerdi jaqynda sý basqandyqtan, aıǵaqtardy saraptamandan ótkizý qıynǵa soǵyp otyrǵanyn jetkizdi. Tipten, medısınalyq saraptamany tis dárigerleriniń kómegimen jasapty. Blogerdiń múrdesi jatqan jerde onyń sómkesi men qoıyndápteri de bolǵan.
«Oǵan bolǵan jaıttyń barlyǵyn qoıyndápterine jazý úshin ýaqyt qajet bolǵan bolýy múmkin. Onda keshirim suraǵan jazbasy da bar shyǵar. Boıjetken Gabbıdiń otbasyna kim bolsa da jaýap berýi kerek. Bul qoıyndápterde naqty jaýap baryna senimdimin,-deıdi krımınalıs Keısı Djordan.
Qyz ben jigittiń otbasy bir-birimen aralaspaıdy. Olar jýrnalıserge qaraǵanda kóp nárseden habardar bolýy múmkin, biraq tisjarmaı otyr. AQSH zańy boıynsha jeke ómirdiń qupıasy qatań saqtalady. Resmı málimdemelerge qaraǵanda Gabbıdiń óliminde eshqandaı mıstıkalyq sıpat joq sıaqty. Alaıda, ınternet qoldanýshylardyń basym kópshiligi bastapqyda bul jaǵdaıdy mıstıkalyq ólimge teńegen edi. Óıtkeni qyz adam júrmeıtin tabıǵat aıasynda kenetten joǵalyp ketti.
«Keshe Gabbı Petıtonyń ákesimen sóılesýdiń reti keldi. Onyń halin bilip, qandaıda bir kómek kórsete alamyn ba dep suradym. Ol qyzynyń otbasylyq zorlyq-zombylyqtyń qurbany bolǵanyna naq senimdi. Men de onymen kelisemin. Biz keıde jaýapqa tartylýy kerek adamdardy baıqaımyz, biraq únsiz qalamyz. Al olardyń áreketi ulǵaıa túsedi de, arty qaıǵyly jaǵdaıǵa ákelgende ǵana san soǵyp qalamyz»,-deıdi Florıdanyń gýbernatory Ron Desantıs.
Saıahat barysynda qyzdyń óz jigitiniń qolynan qaza tapqanyn polısıa kamerasyndaǵy jazba da aıǵaqtaı túsedi. Qydyrýǵa ketken qyzdyń kólikte jylap turǵany polısıanyń kúmánin týdyrǵan. Ony baıqaǵan polısıa kólikti toqtatyp, boıjetkennen bári durys pa dep suraıdy. Alaıda, qyz jigine aryz jazbaǵan, kezdesý tek áńgime túrinde aıaqtalǵan. Osy kezde qyz qatty qatelesse kerek. Eger sol sátte janyndaǵy adamnan boıyn aýlaq alǵanda múmkin tiri qalar ma edi.