Abaı shyǵarmashylyǵy qazaq halqy men ózge ulttar mádenıeti arasyndaǵy dáneker
Qazaqstan Respýblıkasy Táýelsizdiginiń 30 jyldyǵy aıasynda Germanıa Federatıvtik Respýblıkasynyń astanasy Berlın qalasynda, elimizdiń uly aqyny, aǵartýshy, qazaq jazba ádebıetiniń, qazaq ádebı tiliniń negizin qalaýshy Abaı Qunanbaıulyna arnalǵan eskertkishtiń resmı ashylý saltanaty ótti, dep habarlaıdy Almaty-akshamy.kz Baq.kz agenttigine silteme jasap.
Eskertkishtiń ashylý rásimine Mádenıet jáne sport mınıstri Aqtoty Raıymqulova men Qazaqstan Respýblıkasynyń Germanıadaǵy Tótenshe jáne Ókiletti Elshisi Dáýren Káripov qatysty.
Aqtoty Raıymqulova Germanıa halqy men Úkimetine elimizdiń Abaıǵa eskertkish ornatý jónindegi usynysyn qoldap, demeý kórsetkeni úshin alǵys bildirdi.
«Byltyr biz álemdik deńgeıdegi oıshyl, uly aqyn, qazaq jazba ádebıetiniń negizin qalaýshylardyń biri – Abaı Qunanbaıulynyń 175 jyldyq mereıtoıyn atap óttik. Mereıtoı aıasynda Sıngapýrda, Bolgarıada, Majarstanda, Birikken Arab Ámirlikterinde, Pákstanda, Efıopıada, Chehıada Abaı ortalyǵy oqyrmanǵa esigin aıqara ashty. Sonymen qatar Majarstan, Ońtústik Koreıa Respýblıkasy, Fransıa, Túrkıa, Ózbekstan, Mysyr, Reseı Federasıasy jáne basqa elderde Abaı eskertkishi ashyldy.
Abaı shyǵarmashylyǵy qazaq halqy men ózge ulttar mádenıeti arasyndaǵy dáneker. Abaı qazaq halqynyń ǵana tulǵasy emes. Onyń jalpy adamı qundylyqtardy nasıhattaıtyn shyǵarmashylyǵy adamzatqa ortaq, ári álemdik ádebıettiń ajyramas bóligine aınaldy.
Abaı Qunanbaıuly men Germanıa halqynyń uly aqyny Gete poezıasy arasynda tańǵalarlyq úndestikti baıqamaý múmkin emes. Abaı aýdarmasynyń arqasynda biz Iogann Geteniń birshama týyndysymen etene tanystyq. Sonyń biri, ári biregeıi hakim ana tilimizde sóıletken «Qarańǵy túnde taý qalǵyp» óleńi. Osylaısha, Abaı eki halyqtyń ádebıeti men mádenıetin baılanystyrýshy berik kópirge aınaldy. Abaı men Gete sekildi adamzattyń asyl uldaryn ardaqtaý, olardyń murasyn, esimin asqaqtatý – Siz ben bizdiń paryzymyz. Búgin mazmundy meımandostyq dástúrde ótip jatqan is-shara joǵaryda aıtyp ótken rýhanı baılanysty nyǵaıta bererine senimim mol»,-dedi Mádenıet jáne sport mınıstri.
Aıta keteıik, Abaı Qunanbaıuly músininiń avtory «Álem halyqtarynyń óneri» Halyqaralyq Asosıasıasynyń laýreaty Bolat Mekebaev.