Oqý-aǵartý mınıstri Ǵanı Beısembaev qazaqstandyq oqýshylardyń Qyrymǵa sapary týraly pikir bildirdi.
Aıtýynsha, mınıstrlik sáıkes buıryqsyz balalardyń shetelge shyǵýyna tyıym salýdy josparlap otyr, dep habarlaıdy Almaty-akshamy.kz.
- Balalardyń bári aman-esen oraldy. Ata-analarynyń qolyna tabystaldy. Muǵalimge sáıkes jaza berildi, - dep atap ótti vedomstvo basshysy Úkimettiń kýlýarynda tilshilerge bergen suhbatynda.
Sonymen qatar ol lagerge balalar ata-anasynyń bastamasymen barǵandyǵyn aıtty.
«Mınıstrliktiń buıryǵynsyz jáne Balalardy qorǵaý komıtetiniń ruqsatynsyz oqýshylardy shetelge shyǵarýǵa tyıym salý boıynsha jumystar júrgizilip jatyr», - dep túsindirdi Ǵanı Beısembaev.
Eske sala keteıik, 25 mamyrda Oqý-aǵartý mınıstrligi qazaqstandyq oqýshylar toby Rosáriptestik baǵdarlamasy boıynsha Qyrymǵa ketkenin aıtqan edi. Belgili bolǵandaı, bul sapardy profıldik vedomstvomen kelispeı uıymdastyrǵan.