Eńbek jáne halyqty áleýmettik qorǵaý mınıstrligi elimizde qurylatyn ýaqytsha jumys oryndarynyń sanyn shektemeýdi usyndy. Quzyrly organ «Halyqty jumyspen qamtýǵa járdemdesý máseleleri týraly» buıryǵyna osyndaı ózgeris engizip, ashyq talqyǵa shyǵardy, dep habarlaıdy Almaty-akshamy.kz Inform.kz-ke silteme jasap.
Vedomstvo aqparatyna saı, jumys berýshiler bazasynyń shekteýli bolýyna baılanysty birqatar óńirlerde qoǵamdyq jumystarmen qamtý boıynsha másele týyndaǵan.
«2022 jylǵy I jartyjyldyqtyń qorytyndysy boıynsha, Túrkistan oblysynda josparlanǵan 15,4 myń jumyssyz adamnyń tek 9,5 myńy ǵana jumysqa tartylǵan. Osy sıaqty jyldyq jospar Mańǵystaý oblysynda - 54,1, Shymkent qalasynda - 63,7, Jambyl oblysynda - 68,6, Aqmola oblysynda - 69,3, Aqtóbe oblysynda - 71,6, Shyǵys Qazaqstan oblysynda - 71,9%, al Almaty oblysynda - 72 paıyzǵa ǵana oryndalǵan. Bul rette, jumyssyz azamattardyń basym bóligi tirkelgen óńirlerde kóp halyq turatynyn atap ótý kerek. Jumys oryndary sanynyń shekteýli bolýy jumyssyzdar tarapynan narazylyq týdyryp otyr», - dep jazylǵan buıryqta.
Mınıstrlik máseleniń sheshimi retinde qurylatyn ýaqytsha jumys oryndarynyń sanyn shektemeýdi usynyp otyr.
«Búginde barlyq óńirlerde jumyssyz túlekterdi jastar praktıkasymen qamtý boıynsha josparly kórsetkishterdi oryndaı almaý qaýipi bar. 2022 jylǵy 1 shildedegi málimet boıynsha, jastar praktıkasyna 9,7 myń adam jiberildi. Bul – jyldyq jospardyń 38,5 paıyzy. Al, osy aralyqta «Alǵashqy jumys orny» jobasy sheńberinde 1 446 adam qamtyldy. Bul – jyldyq jospardyń 36,1 paıyzy ǵana. «Kúmis jas» jobasymen 816 adam jumys tapty. Osylaısha, atalǵan baǵdarlama boıynsha jyldyq jospardyń 16,3 paıyzyn ǵana oryndadyq. Tómen kórsetkishter jumys berýshiler sanynyń shekteýli bolýyna baılanysty. Sondyqtan, zańnamada kózdelgen shekteýlerdi alyp tastaý usynylady», - dep kórsetilgen qujatta.
Qoldanystaǵy zańnamaǵa sáıkes, búginde qoǵamdyq jumystarǵa jyl saıyn jumyssyz azamattardyń 40 paıyzy tartylady. Al, jylyna áleýmettik qyzmetter men jastar praktıkasy boıynsha jumys izdegenderdiń tek 20 paıyzy qymtylady.