Biz úshin búgin óte aýyr kún, orny tolmas qaıǵy.
Qazaqstannyń İshki ister mınıstri Erlan Turǵymbaev Almatydaǵy atys kezinde qaza tapqandardyń otbasylaryna kóńil aıtty,dep habarlaıdy Almaty-akshamy.kz.
Kóńil aıtý sózderi bas polıseıdiń Facebook áleýmettik jelisindegi jeke paraqshasynda jarıalandy.
«Biz úshin búgin óte aýyr kún, orny tolmas qaıǵy. Aıdyń-kúnniń amanynda Almaty qalasyndaǵy qaıǵyly oqıǵa nátıjesinde 5 azamatymyz oqqa ushty. Onyń ishinde ishki ister organdarynyń eki qyzmetkeri bar. Polısıa maıory Darhan Súleev pen polısıa kapıtany Nurbol Baıǵazıev óz jumystaryn adal atqaryp júrgen qatardaǵy qyzmetkerler edi. Qazaqtyń dańqty batyry Baýyrjan Momyshulynyń “Adam bolý – qasıet, azamat bolý – mindet, patrıot bolý – paryz” degen qanatty sózi bar. Olar adamgershilikterimen aınalasyna abyroıly bolyp, otansúıgishtikterimen talaıǵa úlgi bola bildi. Adam retinde qalyptasty, azamat bolyp atqa qondy, patrıottyq bolmysymen el tynyshtyǵyn qorǵady. Darhan Súleev ishki ister salasynda 18 jyl qyzmet atqarsa, Nurbol Baıǵazıev 7 jyldan beri sapta qyzmet etip keldi. Olardy áriptesteri qyzmetine adal, dostyqqa berik, júregi úlken azamat retinde máńgi este saqtaıdy. Osy marqumdardyń áke-sheshesi, otbasy, týǵan-týystaryna kóńil aıtyp, qaıǵylaryna ortaqtasqym keledi. Marqumdardyń jany jánnatta, topyraǵy torqa, ımany joldas bolsyn!», – dep jazdy mınıstr.