Eńbek jáne halyqty áleýmettik qorǵaý mınıstrligi júktilik pen bosaný tólemderiniń somasyn úlkeıtýdiń ádisterin úıretetin konsýltasıalyq qyzmetterdiń ústinen shaǵym túsirgen. Bul týraly vedomstvo Kazinform saýalyna joldaǵan jaýabynda jazdy, dep habarlaıdy aqshamnews.kz
Eńbek jáne halyqty áleýmettik qorǵaý mınıstri Svetlana Jaqypova BAQ ókilderine júktilik pen bosaný tólemderin shamadan tys rásimdegen 113 adamnyń ústinen qylmystyq 16 is qozǵalǵanyn málim etken bolatyn. Kazinform osy qylmystyq isterdiń orbıtasynda «Mıllıonmen dekretke» kýrsynyń avtorlary bar-joǵyn surady.
- Búginde biz áleýmettik jelilerde (Instagram, Facebook jáne t.b.) úshinshi tulǵalardyń tarapynan ár túrli konsýltasıalyq qyzmetterdiń, onyń ishinde kásipkerlik sýbektileri men dekrettik demalysqa shyǵýdy josparlap otyrǵan áıelder arasynda «formaldy» eńbek sharttaryn jasasý arqyly áleýmettik tólemderdi joǵary mólsherde alý tásilderiniń aıtarlyqtaı óskenin baıqap otyrmyz, - dep jazylǵan jaýapta.
Osy oraıda qazir quzyrly organdar tergeý jumystaryn júrgizip jatyr.
- Atalǵan másele boıynsha mınıstrlik pen Memlekettik áleýmettik saqtandyrý qory ózderiniń quzyreti boıynsha tıisti is-sharalar júrgizý úshin quqyq qorǵaý organdaryna birqatar ótinishke bastamashylyq jasady. Qozǵalǵan qylmystyq ister sheńberinde jedel tergep-tekserý jumystary júrgizilip jatyr. Qazaqstan Respýblıkasy Qylmystyq-prosestik kodeksiniń 201-babyna sáıkes sotqa deıingi tergep-tekserý derekterin jarıa etýge jol berilmeıdi, - dep jazylǵan jaýapta.