Kásibı tenısshiler qaýymdastyǵy (ATP) jańartylǵan reıtıńti jarıa etti.
Qazaqstannyń úzdik tenısshisi Aleksandr Býblık 37-shi, Tımofeı Skatov 146-shy ornynda qaldy.
Ótken aptada Italıadaǵy Andrıa chellendjer týrnıriniń fınalyna deıin jetken Mıhaıl Kýkýshkın 223-shi orynnan 192-shi orynǵa kóterildi, dep habarlaıdy Almaty-akshamy.kz QazAqparatqa silteme jasap.
Iaǵnı ol úzdik 200 tenısshiniń qataryna qaıta kirdi. Denıs Evseev 295-ten, 293-ke, Beıbit Jýkaev 315-ten 311-ge joǵarylady.
Úzdik úshtikte burynǵysha ıspanıalyqtar Karlos Alkaras pen Rafael Nadal, norvegıalyq Kasper Rýýd, juptyq synda nıderlandtyq Ýeslı Kolhof, ulybrıtanıalyq Nıl Skýpskı, amerıkalyq Radjıv Ram keledi.
Juptyq synda qazaqstandyqtar Andreı Golýbev 47-satyda qalsa, Aleksandr Nedovesov 53-ten 52-ge, A.Býblık 173-ten 170-ke shyqty.
Áıelder tenısi qaýymdastyǵy (WTA) jarıalaǵan reıtıńide jekeleı synda Elena Rybakına 22-ornynda tursa, Iýlıa Pýtınseva 52-den 51-ge, Jibek Qulambaeva 435-ten 433-ke bıiktedi.
Úzdik úshtikte ózgeris joq – Polsha ókili Iga Sventek, týnıstik Ons Jaber, amerıkalyq Djessıka Pegýla, juptyq synda chehıalyq Katerına Sınákova, reseılik Veronıka Kýdermetova, taǵy bir chehıalyq Barbora Kreıchıkova kósh basynda.
Juptyq synda Anna Danılına 11-ornynda qalsa, J.Qulambaeva 200 tenısshiniń qataryna (+3) kirdi.