Keshegi ótken Ulttyq quryltaıda eldiń búgini men bolashaǵyna tikeleı qatysty, kezek kúttirmeıtin, shyn máninde jalpyulttyq mańyzy bar máseleler talqylandy. Prezıdentimiz Qasym-Jomart Toqaev ult birligin saqtaý, ekonomıkany zaman talaptaryna saı damytý, ıdeologıalyq jumysty jandandyrý sıaqty kúrdeli máselelerge erekshe mán bergenine barshamyz kýá boldyq.
Saıası turǵydan alǵanda, qoǵamdaǵy tatýlyq pen birlik – reformalardyń tabysty júzege asýynyń kepili. Ulttyq quryltaıdyń maqsaty da osy – halyqtyń kókeıindegi máselelerdi ashyq aıtyp, onyń sheshý joldaryn qarastyrý. Prezıdent usynǵan «alýan túrli pikir – birtutas ult» qaǵıdaty Ulttyq Quryltaıda óz kórinisin tapqany – ómir shyndyǵy. Keshegi jıynda Ulttyq quryltaıdyń múshesi retinde ózim de sóz sóılep, rýhanı salanyń kókeıkesti máselelerine toqtaldym. Basqa da áriptester ózderine tıesili salalar boıynsha óz pikirlerin ortaǵa saldy.
Ekonomıkanyń jetistikterimen qatar onda talaı jyl boıyna sheshimin tappaı, qordalanyp qalǵan problemalar da ashyq aıtyldy. Ózim tánti bolǵan bir jaıt sol: ekonomıkadaǵy kúrmeýi qıyn máselelerge qatysty sheshimder popýlızmnen múldem ada, memlekettiń strategıalyq múddelerine saı qabyldanýda. Qazirgi, qarjy tapshy kezeńde memlekettiń ınvestısıany bilim, ǵylym, densaýlyq saqtaý jáne kólik salalaryna jumsaýy – halqymyzdyń turmys sapasyn jaqsartýǵa baǵyttalǵan mańyzdy sheshimder dep oılaımyn. Ádiletti salyq júıesin qalyptastyrý – qoǵamdaǵy tabys teńsizdigin azaıtyp, ekonomıkamyzdy turaqtandyrýdyń negizgi tetikteriniń biri bolyp tabylatyny sózsiz.
Ulttyq quryltaıda ultymyzdyń rýhanı ómiriniń san salaly máseleleri talqylanýy jaqsy dástúrge aınalyp barady. Bul jolǵy jıynda da ádebıet, mádenıet pen óner taqyryby keńinen sóz boldy. Jáne de Prezıdentimizdiń osy salalardaǵy jaǵdaıdan, onda oryn alyp jatqan tendensıalar men jeke oqıǵalardan habardar, maǵlumaty mol ekenin baıqadyq. Quryltaıda sıfrlandyrýdyń ulttyq rýhanıatty ilgeriletýdegi róli erekshe atap ótildi. Aqparattyq tehnologıalardy tıimdi paıdalaný arqyly mádenı murany keńinen nasıhattaý – zaman talaby. Bul baǵytta ádebıet, óner jáne tarıhı jadyny sıfrlyq keńistikke beıimdeý óte-móte ózekti dep oılaımyn. Bul sharýaǵa óz áriptesterimen birlese otyryp, Jazýshylar odaǵy da belsene aralaspaq.
Prezıdentimiz bıyl atap ótiletin Abaı Qunanbaıulynyń 180 jyldyǵyna jeke toqtaldy. Osy dataǵa oraı Jazýshylar odaǵy da aýqymdy josparlardy júzege asyrmaq. Sonyń biri – uly oıshyldyń týǵan kúnin Qazaqstannyń barlyq óńirinde bir mezette, onlaın formatta atap ótý. Mundaı keń aýqymdy is-shara tek merekelik sıpatqa ıe emes, ol Abaı álemine taǵy bir ret tereń boılap, onyń rýhanı murasyn búgingi qoǵammen, jas urpaqpen baılanystyrýdyń joly bolmaq. Atap aıtqanda, Mahambet, Jambyl, Abaı mereıtoılary osy joba aıasynda atap ótiletin bolady.
Qoryta aıtsam, Ulttyq quryltaı búginde halyq pen bıliktiń arasyndaǵy ashyq, jan-jaqty da tereń dıalog alańyna aınaldy. Endigi jerde osy bıik minbede aıtylyp, talqylanyp, qoldaý tapqan ıdeıalar men bastamalardy júzege asyrý barshamyzdyń – qoǵamnyń, bılik ınstıtýttarynyń – mártebeli mindeti dep sanaımyn.