1-maýsym – Balalardy halyqaralyq qorǵaý kúni qarsańynda «Alataý» áleýmettik qyzmet kórsetý ortalyǵy «Baıserke-Agro» agroholdınginiń «Qobylandy» jylqy zaýytynyń mamandarymen birlesip, «Senim» áleýmettik qyzmetter ortalyǵynyń balalaryna qaıyrymdylyq is-shara uıymdastyrdy.
Merekelik is-sharaǵa Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov, áleýmettik qyzmet kórsetý ortalyqtarynyń basshylary, «Qobylandy» jylqy zaýyty kesheniniń qyzmetkerleri men BAQ ókilderi jáne «Alataý» jáne «Senim» ortalyqtarynyń tárbıelenýshileri qatysty.
Merekelik is-shara barysynda «Alataý» áleýmettik qyzmet kórsetý ortalyǵynyń Jazǵy eńbek jáne demalys lageri saltanatty túrde ashylyp, tusaýy kesildi.
Ras, búgingi tańda aıryqsha kútimge muqtaj balalarǵa qolaıly orta qalyptastyryp, medısınalyq kómek berý úshin mamandandyrylǵan saýyqtyrý ortalyqtarynyń mańyzy zor.
«Alataý» áleýmettik qyzmet kórsetý ortalyǵynyń dırektory Gúlfaırýz Qasymovanyń aıtýynsha, ortalyqta 18 ben 40 aralyǵyndaǵy damýynda aýytqýy bar 180 bala em alyp, tárbıelenip jatyr.
– «Alataý» áleýmettik qyzmetter ortalyǵy 18 jastan 40 jasqa deıingi damýynda aýytqýy bar balalarǵa stasıonarlyq úlgidegi medısınalyq–áleýmettik qyzmet kórsetetin mekeme. Táýlik boıy jumys istep, 8 baǵytta qyzmet kórsetetin ortalyqta serebraldy sal aýrýy, Daýn aýrýy, aýyr jáne tereń aqyl-oı jetkiliksizdigi, psıhıkalyq jáne motorlyq damýdyń kesheýildeýi, epılepsıa dıagnozdarymen aýyratyn balalar emdeledi. Bizdiń mısıamyz, osyndaı erekshe qajettiligi bar balalardyń qoǵamnan tys qalmaı, ortada tárbıelenip, bilim alýyna, densaýlyqtaryn jaqsartýǵa jan-jaqty qoldaý kórsetý. Biz byltyr «Qobylandy» ıpodromynda balalardy jylqy terapıasymen emdeýge ǵana ákeletinbiz. Bıyl osy aýmaqtan jer alyp, jazǵy eńbek jáne demalys lagerin ashyp otyrmyz. Bul jerge balalar aǵash otyrǵyzyp, kókónis egedi. Sodan keıin olardy ózderi baptaıdy, ósiredi, kútedi. Al myna kıiz úılerde demalady, oınaıdy, – deıdi ortalyq basshysy.
Erekshe balalarǵa – erekshe qoldaý qajet. Óıtkeni olar da qoǵamda ózderin erkin sezinýi tıis. Bul baǵytta Almatyda az jumys atqarylyp jatqan joq. Qala bıligi tarapynan erekshe kóńil bólinip, qoldaý kórsetilýde. Gúlfaırýz Qabdenqyzynyń aıtýynsha, ótken aptada Almaty qalasynyń ákimi Erbolat Dosaevtyń qoldaýymen «Alataý» ortalyǵynyń 6 tárbıelenýshisi baspanaly bolypty.
Ashyq aspan astynda uıymdastyrylǵan merekelik keshte balalarmen birge sýret salyp, áńgimelesip otyrǵan Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Janatulyn áńgimege tarttyq:
- Búgin, 1 maýsym – Halyqaralyq balalardy qorǵaý kúni qarsańynda basqarmanyń qaramaǵyndaǵy «Alataý» jáne «Senim» áleýmettik qyzmet kórsetý ortalyqtarynda tárbıelenip, em alyp jatqan balalarǵa arnap merekelik is-shara uıymdastyryp jatyrmyz. Bul ortalyqtarda damýynda psıhonevrologıalyq aýytqýlary bar balalar em alady. Mereke qarsańynda «Qobylandy» atpen serýendeıtin mekemeniń qoldaýymen ıpoterapıa, eńbek terapıasyn qarastyrdyq, odan basqa munda olar úshin qyzyqty baǵdarlamalar men syılyqtar úlestirýdi uıymdastyrdyq. Bizdiń maqsatymyz – osyndaı erekshe kútimdi qajet etetin balalarǵa barynsha qoldaý kórsetý, - deıdi Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Janatuly.
«Alataý» áleýmettik qyzmetter ortalyǵy dırektorynyń áleýmettik jumys jónindegi orynbasary Nazıra Myqtybekqyzynyń aıtýynsha, bul is-sharanyń maqsaty – balalarǵa kóterińki kóńil-kúı syılap, olardyń merekelerge emosıonaldy jaqsy kózqarasyn týdyrý, zeıindi, shyǵarmashylyqty damytý, tabıǵat pen janýarlarǵa degen súıispenshilikti oıatý.
– Búgingi merekelik sharanyń balalar úshin paıdasy kóp. Osyndaı basqosýlar olardyń áleýmettik-qoǵamdyq ómirge beıimdelýine jáne ózderi qatarlas baldyrǵandarmen aralasýyna septigin tıgizedi. Shet elderde erekshe balalarǵa qalypty kózqaras qalyptasqan. Al bizde olarǵa úrke qaraıtyn jandar kóp. Sondyqtan, erekshe balalar qoldaýǵa muqtaj, meıirimge zárý, - deıdi ol.
İs-shara barysynda balalar ortalyqtyń pedagog-sýretshilermen Art-alańda sýret salyp, ózderi teatrlandyrylǵan qoıylym qoıdy, anımatorlardyń qatysýymen túrli oıyndar oınady. Odan keıin jylqy zaýytynda ekskýrsıa jasap, atqa minýge múmkindik aldy. Qonaqqa kelgen balalardyń barlyǵyna túski as berilip, syılyqtar úılestirildi. Uıymdastyrýshylardyń aıtýynsha, balalar merekesi erteń ortalyqta keń kólemde atalyp ótiledi.
