Onda tanymal áıelderdiń tilegi jazylǵan.
Jańa Adamdar belsendileri Qazaqstannyń tanymal áıelderiniń joldaýy bar 10 000 kámpıtti mereke qarsańynda syıǵa tartty, dep habarlaıdy Almaty-akshamy.kz Elorda.info saıtyna silteme jasap.
100 jyldan beri álemde jyl saıyn Halyqaralyq áıelder kúni atalyp ótedi. Biraq osydan eki júz jyldaı buryn áıelder saılaýda daýys berýge de qatysa almaıtyn, tipti joǵary oqý ornynda bilim alýǵa múmkindigi bolmaıtyn. Al qazir she? Ókinishke qaraı, Qazaqstan qoǵamynda áıelderge kemsite qarap, quqyqtaryn buzý jaıttary áli de kezdesip turady. Onyń biraz mysalyn bárimiz bilemiz. Demek áli de kúresti toqtatpaý kerek.
Jańa Adamdar belsendileri Halyqaralyq áıelder kúnine qaraı jetistikke jetip qana qoımaı, óz salasynda úzdik atanǵan tanymal ári tabysty qazaqstandyq áıelderdiń joldaýy jazylǵan 10 000 kámpıt daıyndady. Óz isiniń sheberi atanǵan áıelder «Armanyńyzǵa qoryqpaı talpynsańyz, bul ómirde bári múmkin» degen úndeýmen jeke jaǵdaılaryn úlgi etedi. Olar kez kelgen qyz bala ataqty ǵalym da, tabysty saıasatker de nemese búkil álemge áıgili boksshy bola alady degen senim artty.
Motıvasıalyq joldaýlardy jazǵandar:
Nellı Býbe – QR eńbek sińirgen mádenıet qaıratkeri, sýretshi, grafık, ıllústrator.
Aıda Balaeva – Qazaqstan memleketiniń qaıratkeri. 2022 jylǵy 11 qańtardan bastap Prezıdent Ákimshiligi basshysynyń birinshi orynbasary. Aqparat jáne qoǵamdyq damý mınıstri. Áleýmettaný ǵylymdarynyń kandıdaty.
Baıan Maqsatqyzy – qazaqstandyq prodúser, Shine Production kompanıasynyń basshysy, telejúrgizýshi, aktrısa, ánshi.
Aısulý Ernıazova – Ǵylym jáne joǵary bilim mınıstriniń keńesshisi.
Damel Mektebepbaeva – bıotehnolog, Qozybaev ýnıversıtetiniń prorektory, NASA-ǵa túsken alǵashqy qazaqstandyq.
Nazym Qyzaıbaı – qazaqstandyq boksshy, jeti dúrkin Qazaqstan chempıony, eki dúrkin álem chempıony.
Dınara Sádýaqasova – shahmattan 4 dúrkin álem chempıony, Azıa chempıony, halyqaralyq grosmeıster.
Qurarbek Eńlik – qazaqstandyq shoý-bıznestiń juldyzy.
Ásel Badenova – Jańa Adamdar jastar qozǵalysynyń kóshbasshysy.
Sizderdiń qoldaryńyzda turǵan – Qazaqstannyń áıgili áıelderiniń «joldaýly kámpıtteri». Árbir kámpıtte – sizderge degen joldaý bar, onda – olardyń jeńisi týraly, bastysy, biregeı tarıhy jazylǵan. Bul kámpıtter tek syılyq qana emes, óz armandaryńyzdy qaldyrmaı, qalaı da bolsa júzege asyrýǵa talpynys jasaýǵa úndeý. Óıtkeni sizderdiń jumystaǵy, sporttaǵy, bıznestegi, otbasyndaǵy, ómirdegi jeńisterińiz Qazaqstandy tek qana kórkeıtedi! – deıdi Jańa Adamdar jastar qozǵalysynyń belsendisi Rızabek Rashıt.