Almatyda belgili qoǵam belsendisi, atyshýly Amantaı qajy ústinen qozǵalǵan qylmystyq iske qatysty Aqshamnews.kz tilshisine pikir bildirdi. Ol ózine taǵylǵan aıypty joqqa shyǵardy.
Amantaı qajynyń jaýaby
“Amantaı qajyny 15 táýlikke otyrǵyzyp qoıdy dep júrgenniń bári ótirik. Shyn máninde eshteńe de bolǵan joq, júrmin ǵoı mine. Men stadıonǵa 50 jyldan asa baramyn. Sol kezde Bıǵaısha degen áıel iship alyp, aldymnan shyǵyp, qushaqtaıdy. Men qolyn qaǵyp jiberdim boldy. Men ony urǵan joqpyn, onyń ústine ıtermedim de. Artynsha aýrýhanaǵa bardyq. Oǵan qatty eshteńe bolmaǵan. Qazir júr shaı iship”, - deıdi Amantaı qajy.
Buǵan deıin ne aıtyldy?
Amantaı qajy zeınetker áıeldi baspaldaqtan qasaqana ıterip jibergen degen kúdikpen qajyǵa qatysty tergeý bastaǵan bolatyn.
Almaty qalasy Polısıa departamentiniń málimetinshe, Almaly aýdandyq polısıa basqarmasy atalǵan derek boıynsha QR Qylmystyq kodeksiniń 107-baby ("Densaýlyqqa qasaqana ortasha aýyrlyqtaǵy zıan keltirý") boıynsha is qozǵaǵan. Zeınetker áıeldiń alǵan jaraqatynyń aýyrlyq deńgeıin anyqtaý úshin sot-medısınalyq saraptama taǵaıyndaldy. Saraptama nátıjesine saı, tergeý sheńberinde prosesýaldyq sheshim qabyldanbaq.
Qandaı jaza qarastyrylǵan?
Eger qajynyń kinási dáleldense, zań boıynsha oǵan:
-
eki jylǵa deıin bas bostandyǵynan aıyrý, nemese
-
myń aılyq eseptik kórsetkish (shamamen 4 mıllıon teńge) kóleminde aıyppul salynýy múmkin.