Búgin, Almaty qalasynda Qazaqstannyń halyq qaharmany, aty ańyzǵa aınalǵan ushqysh-ǵaryshker Talǵat Amangeldiuly Musabaevpen qoshtasý rásimi ótti. Qaraly jıyn Ofıserler úıinde uıymdastyryldy, dep habarlaıdy Aqshamnews.kz tilshisi.
Qoshtasý rásimine marqumnyń otbasy men týystary, áriptesteri men dostary, qoǵam jáne memlekettik mekemeler ókilderi qatysty. Qatysýshylar qatarynda QR Memlekettik keńesshisi Erlan Qarın, Qazaqstannyń tuńǵysh ǵaryshkeri Toqtar Áýbákirov, Halyq qaharmany, ushqysh-ǵaryshker Aıdyn Aıymbetov, Almaty ákimi Darhan Satybaldy, Almaty qalalyq máslıhatynyń tóraǵasy Meıirjan Otynshıev, Qorǵanys jáne aeroǵarysh salasynyń basshylary boldy.
Aıta keteıik, memleket basshysy Qasym-Jomart Toqaev Talǵat Musabaevpen qoshtasý rásimin joǵary deńgeıde ótkizýge arnaıy tapsyrma bergen.
sýret: aqshamnews.kz/Nurbol Yntymaquly
Astanadan arnaıy kelgen qonaqtar sóz sóıledi
Memlekettik keńesshi Erlan Qarın qaraly jıynda sóz sóılep, marqumnyń týǵan-týystaryna kóńil aıtty:
"Halyq qaharmany Talǵat Musabaevtyń qazasyna oraı barshańyzǵa qaıǵyryp kóńil aıtamyn. Qaraly habar jetken boıda Memleket basshysy Qasym-Jomart Toqaev qoshtasý rásimin uıymdastyrý týraly tapsyrma berdi. Búgin Astanadan Qorǵanys mınıstrligi, Aeroǵarysh salasynyń ókilderi jáne halyq qaharmandary Toqtar Áýbákirov pen Aıdyn Aıymbetov arnaıy kelip otyr. Bul - memleket basshylyǵynyń Talǵat Musabaevqa degen erekshe qurmetiniń belgisi" dedi ol.
sýret: aqshamnews.kz/Nurbol Yntymaquly
"Musabaevtyń esimi el tarıhynda máńgige jazyldy"
Ǵaryshker ári áriptesi, halyq qaharmany Toqtar Áýbákirov qoshtasý sózinde Talǵat Musabaevtyń ǵarysh salasyna qosqan ólsheýsiz úlesin atap ótti:
"Qaı jerde júrsek te, qaı ǵarysh aılaǵynan ushsaq ta, qaıda ketsek te, biz árqashan óz kásibimizge, ǵaryshqa adal boldyq. Óıtkeni ǵarysh bizdi biriktirdi. Talǵat Amangeldiuly, sen Qazaqstan úshin kóp is tyndyrdyń. Sen naǵyz patrıot ediń. Muny men de, búkil halyq ta kórip, kýá boldy. Sen bárin taza júrekpen, adal nıetpen jasadyń. Eń mańyzdysy - sende árdaıym ózgelerde kezdespeıtin ıdeıalar boldy. Sol ıdeıalardy iske asyra aldyń. Saǵan sońǵy ret qosh aıtyp, otbasyńa, halqyńa myna nárseni jetkizgim keledi: Qazaqstan seni eshqashan umytpaıdy. Seniń atyń el tarıhynda máńgilikke jazyldy. Jatqan jeriń jaıly bolsyn, qymbatty dos!" dedi Toqtar Áýbákirov.
sýret: aqshamnews.kz/Nurbol Yntymaquly
Sońǵy sapar
Qoshtasý rásiminen keıin 28 gvardıashy-panfılovshylar atyndaǵy saıabaqta qaraly mıtıń ótti. Marqum Talǵat Musabaevtyń denesi Keńsaı zıratyna jerlendi.
Eske salaıyq, Halyq qaharmany, ushqysh-ǵaryshker Talǵat Musabaev 4 tamyzda ómirden ótken bolatyn. Ol - Qazaqstannyń ǵarysh salasyn álemge tanytqan, eldiń damýyna úlken úles qosqan biregeı tulǵa edi. Musabaev artynda óshpes iz, urpaqqa ónege qaldyrdy.