«Meniń baýyrym» jobasy aıasynda eriktiler Almaty, Astana, Qaraǵandy, Qyzylorda, Almaty jáne Jetisý oblystarynyń 400-den astam mektebinde belsendi jumys júrgizýde.
Bul bastama azamattyq qoǵamnyń belsendiligin arttyrýda mańyzdy ról atqarady, ol boıynsha árbir adam qazaqstandyq balalardyń salamattyǵyn saqtaýǵa jáne qoldaýǵa óz úlesin qosa alady, dep habarlaıdy Almaty-akshamy.kz Oqý-aǵartý mınıstrligine silteme jasap.
«Mektepterde jumys isteıtin eriktiler muǵalimder men oqýshylarǵa kómek qolyn soza otyryp, bilim berý prosesinde túrli jobalar men bastamalardy iske asyrýda. Olar ınovasıalyq bilim berý baǵdarlamalaryn qurýǵa, qosymsha sabaqtar men is-sharalar ótkizýge úles qosýda, bul óz kezeginde oqytý-tárbıe berý ortasyn damytýǵa, balalar úshin múmkindikter aıasyn keńeıtýge jáne bilim sapasyn arttyrýǵa yqpal etedi», - dep atap ótti Balalardyń quqyqtaryn qorǵaý komıtetiniń tóraǵasy Nasymjan Ospanova.
Qazirgi ýaqytta jobaǵa elimizdiń 36 joǵary oqý oryndary men kolejderinen 4 myńǵa jýyq stýdent qatysýda, bul jastardyń qolaıly bilim berý ortasyn qurýǵa qoldaý kórsetýge múddeliligin kórsetedi. Aıta keteıik, jobany iske asyrýǵa Qyzylorda oblysy da qosyldy. Óńir pedagogteri men stýdentteri úshin Syrdarıa, Jalaǵash, Qarmaqshy, Shıeli, Jańaqorǵan aýdandarynyń ortalyqtarynda ádistemelik semınarlar uıymdastyryldy.